Жасанды интеллект әлеміндегі өткен аптаның басты жаңалықтары қандай

OpenAI, Google, xAI сынды алпауыттар өз жасанды интеллект жүйелерін жетілдіру үшін белсенді қадамдар жасауда. Алайда аптаның ең ерекше жаңалығы Microsoft тарапынан келді. Microsoft көп сынға ұшыраған Windows Recall функциясын қайта іске қосқанын хабарлады.

Цифрлық құпиялылықтың жойылуына әкелуі мүмкін бұл функцияның енгізілуі, жасанды интеллект бағытында қаншалықты абайсыз қадамдар жасалып жатқанын тағы бір мәрте көрсетті.

Microsoft қайтадан Windows Recall функциясын іске қосты

Жеке деректердің қолды болуынан қорқатындар үшін өткен апта расында қорқынышты жаңалықтар әкелді. Microsoft былтыр қоғамдық реакцияға байланысты тоқтатқан Windows Recall функциясын қайтадан қолданысқа енгізді. Бұл мүмкіндік Windows-тағы Copilot жасанды интеллектіне интеграцияланған және әр 5 секунд сайын экрандағы көріністі сақтап отырады. Microsoft мұның пайдаланушыларға қажет ақпаратты тез табуға көмектесетінін айтқанымен, жеке деректердің толық бақылануы үлкен алаңдаушылық тудырып отыр.

ChatGPT-нің тегін нұсқасына Deep Research мүмкіндігі қосылды

Бұрын тек ақылы жазылым қолданушыларына ұсынылған Deep Research (Терең зерттеу) мүмкіндігі енді тегін қолданушылар үшін де ашылды. Айына 5 рет пайдалану шектеуімен бұл мүмкіндік ChatGPT-ге интернеттен ең жаңа деректерді жинап, терең сараптама жасауға жол ашады. Пайдаланушылар енді күрделі сұрақтарға әлдеқайда толық әрі дәл жауап ала алады.

Google Genie 2: Интерактивті виртуалды әлемдер құру

Google өздерінің желтоқсанда таныстырған Genie 2 жасанды интеллект моделін толық сипаттады. Бұл диффузиялық модель 3D кеңістікте интерактивті виртуалды әлемдер жасай алады. Genie 2 пайдаланушының әрекеттерін бақылап, виртуалды әлемдегі элементтерді нақты уақыт режимінде бейімдейді. Модель тіпті көзден ғайып болған элементтерді де есінде сақтап, қайтадан дұрыс қалыпта қайта жасай алады. Бұл технология болашақта ойындар мен күрделі симуляциялар саласында үлкен рөл ойнайды.

OpenAI ChatGPT арқылы тікелей сауда жасаудың негізін қалады

OpenAI ChatGPT арқылы тікелей сауда жасау мүмкіндігін дамытуды қолға алды. Бұл үшін олар Shopify платформасымен әріптестік орнатпақ. Енді жақын болашақта қолданушылар ChatGPT арқылы өнімдерді көріп, ешқандай сыртқы сайттарға өтпестен сатып ала алатын болады.

Grok камера арқылы қоршаған ортаны көре алады

xAI компаниясы өздерінің жасанды интеллекті Grok-қа Vision деп аталатын жаңа мүмкіндік қосты. Бұл функция арқылы қолданушылар телефон камераларын пайдаланып, Grok-қа заттарды немесе орынды көрсете алады. Grok енді тек мәтінмен ғана емес, шынайы визуалды ақпаратпен де жұмыс істей алады.

Nvidia-ның Қытайға H20 чиптерін сатуы шектелді

АҚШ үкіметі Nvidia компаниясының ең дамыған GPU чиптерін Қытайға сатуға қойған шектеулерді күшейтті. Бұдан былай Nvidia H20 чиптерін де Қытайға еркін сата алмайды. Бұл Қытайдағы компанияларды өздерінің жергілікті GPU өндірісін жеделдетуге итермелеп отыр. Huawei сияқты ірі компаниялар енді өздерінің жоғары өнімді Ascend 910C чиптерін шығара бастайды.

DeepSeek жаңа тиімді моделін таныстыруға дайын

Қытайлық DeepSeek компаниясы арзан әрі тиімді жасанды интеллект модельдерін жасауда алға шықты. Енді олардың DeepSeek-R2 моделі алдыңғы нұсқамен салыстырғанда 97%-ға арзан жұмыс істейтін болады. Бұл оны әлемдегі ең үнемді әрі өнімді AI моделіне айналдыруы мүмкін.

Жасанды интеллект пайдаланушыларының саны артып келеді

ChatGPT, Gemini, Grok секілді жасанды интеллект жүйелерін тұрақты пайдаланушылар саны қарқынды өсуде:

• Google-дың Gemini жүйесі ай сайын 350 миллион қолданушыға жетті;
• AI Overviews арқылы айына 1,5 миллиард іздеу орындалады;
• OpenAI ChatGPT жүйесінде 600 миллион ай сайынғы белсенді қолданушы бар.

Google Chrome браузеріне жасанды интеллект компаниялары қызығушылық танытуда

АҚШ-тағы монополияға қарсы тергеу нәтижесінде Google Chrome браузерінен айырылуы мүмкін. Қазірдің өзінде OpenAI және Perplexity сынды жасанды интеллект компаниялары Chrome-ды сатып алуға ниет білдірді.

Photoshop-та енді AI агент болады

Adobe компаниясы Photoshop бағдарламасына жаңа AI агент енгізетінін хабарлады. Бұл агент қолданушыларға құралды үйренуге көмектеседі және кейбір әрекеттерді автоматты түрде орындауға мүмкіндік береді.

Осы аптада шыққан жаңа визуалды генерация құралдары:

• Character.AI – жаңа AvatarFX мүмкіндігі арқылы пайдаланушылар өз аватарларын енді видео форматында жасай алады.
• Argil AI – жарнамалық өнімдерді жасанды интеллектпен көрсететін жаңа жүйені іске қосты.

Жасанды интеллект әлемінен қысқаша жаңалықтар:

• Perplexity Assistant iOS құрылғылары үшін іске қосылды.
• Meta Ray-Ban ақылды көзілдіріктеріне тікелей аударма мүмкіндігін қосты.
• Google Gemini жақын арада Android Auto және Wear OS құрылғыларына келеді.
• Samsung пен Google арасындағы келісім бойынша Gemini Samsung құрылғыларында алдын ала орнатылады.
• ECMWF жасанды интеллект көмегімен ауа райын болжаудың жаңа дәуірін бастады.
• Columbia университетінің бұрынғы студенті жасанды интеллектімен жасырын шпаргалка жүйесін жасап, 5,3 миллион доллар инвестиция тартты.
• Nari Labs атты кореялық стартап ElevenLabs моделіне бәсекелес жаңа ашық бастапқы дыбыс синтезін таныстырды.
• Швейцария ғалымдары жасанды интеллект арқылы 44 жаңа жұлдыз жүйесінен өмір белгілерін анықтады.
• Meta компаниясы жасанды интеллект арқылы Instagram мен Facebook қолданушыларының жасын анықтай бастайды.

Қысқа да нұсқа. Жазылыңыз telegram - ға