Жапондар шаштың ағаруын тоқтататын тың жаңалық ашты
Жапон ғалымдары шаштың табиғи түсін сақтауға көмектесетін табиғи антиоксидантты анықтады. Бұл зат біздің күнделікті тағамымызда кездесетін көкөністердің құрамында бар. Зерттеу нәтижесі шаш күтімі саласына тың жаңалық әкелуі мүмкін, деп хабарлайды El.kz ақпарат агенттігі.
Шаштың ағаруы - жас ұлғайған сайын пайда болатын табиғи процесс. Бұл құбылыс шаш фолликулдарындағы пигмент жасушаларының — меланоциттердің — жұмысының өзгеруіне байланысты. Уақыт өте келе организмде меланин өндірісі төмендейді. Ал меланин — шаштың, терінің және көздің түсіне жауапты пигмент. Меланоциттердің азаюы — шаштың ағаруына негізгі себеп.
Нагой университетінің биохимиктері лютеолин деп аталатын табиғи антиоксиданттың ағаруға қарсы әсерін зерттеді. Лютеолин – ақжелкенде, балдыркөкте (сельдерей), шайда, брокколиде, пиязда, бұрышта және сәбізде кездесетін өсімдік негізіндегі зат.
Зерттеу барысында лютеолин, гесперидин және диосметин сынды бірнеше табиғи қосылыстың әсері зертханалық егеуқұйрықтарда тексерілді. Бұл егеуқұйрықтар арнайы өсіріліп, ағаруға бейімделген түрлер болды. Лютеолин енгізілген жануарларда қара түсті жүн сақталған, ал басқа топтағы егеуқұйрықтардың жүні ағара бастаған.
Нәтиже біз күткеннен де ерекше болды. Біз антиоксиданттардың әсер етуі мүмкін екенін білгенбіз, бірақ тек лютеолин ғана айтарлықтай нәтиже көрсетті, — дейді профессор Масаси Като.
Ғалымдардың айтуынша, лютеолин эндотелиндер деп аталатын ақуыздарға әсер етеді. Бұл ақуыздар жасушалар арасындағы байланысқа жауап береді. Лютеолин пигмент жасушаларының (меланоциттер) белсенділігін сақтап тұруға көмектесіп, шаштың түсін жоғалту процесін баяулатады.
Лютеолин шаштың өсу немесе түсу цикліне айтарлықтай әсер еткен жоқ. Бұл оның негізгі әсері пигментацияға — яғни, түске — бағытталғанын білдіреді, — деп толықтырды Като.
Зерттеу авторлары бұл жаңалықтың негізінде шаш күтіміне арналған жаңа өнімдер пайда болуы мүмкін екенін алға тартады. Сонымен қатар, лютеолиннің қартаюға қарсы қасиеттерін зерттеу арқылы басқа да жасқа байланысты өзгерістерге — мысалы, шаш түсуіне қарсы күреске — қолдануға болады деген үміт бар.
Қысқа да нұсқа. Жазылыңыз telegram - ға