Жамбыл облысының Қордай ауданында жаңа саябақ ашылды
Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» акциясы аясында Жамбыл облысы Қордай ауданында демалыс орны ел игілігіне берілді, деп хабарлайды El.kz ақпарат агенттігі.
Жамбыл облыстық әкімдігінің мәліметінше, аумағы 2,57 гектарды құрайтын аллеяның маңайына қиыршық тас төселіп, жарықтандыру тіректері орнатылған.
Сонымен бірге тұрғындарға демалатын арнайы орындықтар да бар. Мұнда қырық түп шырша және отыздан аса «катальпа» сәндік ағаш көшеттері отырғызылған. Бұдан бөлек, айналасын көгалдандыру жұмыстары назардан тыс қалмаған. Су қойманың жағажайына пирс жасалып, серуендеуге ерекше көңіл бөлінген. Кішкентай балақайларға арналып ойын алаңшасы да салынды, - делінген мәліметте.
Саябақтың ашылуына қатысқан аудан әкімі Бегзат Болатбеков аудан тұрғындарын жаңа демалыс орнының ашылуымен құттықтап, тұрғындардың денсаулығын нығайтып, салауатты өмір салтын насихаттауда саябақтың атқарар рөлі орасан зор екенін алға тартты.
Ашылу салтанатына қатысқан тұрғындар аудандық өнер мектептерінің суретші, шахматшы, әнші, күйшілердің өнерін тамашалап, алған әсерімен бөлісті.
Міне, бүгін ауыл тұрғындарының тілегі ескеріліп, Қордай ауылында ерекше мәні бар жаңа аллеяның ашылу рәсіміне жиналып отырмыз. Ауданымыз соңғы жылдары күннен-күнге көркейіп келеді. Біз өте қуаныштымыз. Бұл демалыс орнының қызығын ұрпағымыз көрсін! Баршаңызға тек жақсылық тілеймін, - деп Жамбыл облысының және Қордай ауданының Құрметті азаматы Сүгірбай Төле өзінің қуанышын жеткізді.
Айта кету керек, жобаға аудандық бюджеттен 100 млн теңге бөлінген.
Қысқа да нұсқа. Жазылыңыз telegram - ға