Ұшақта адамды құтқарып қалған студенттің оқу ақысын әкім төлейтін болды

Қызылорда облысы әкімі Нұрлыбек Нәлібаев «Қызылорда - Астана» бағытындағы ұшақ бортында адам өмірін құтқарып қалған Дінмұхаммед Бектұрғанның ата-анасымен кездесті, деп хабарлайды El.kz ақпарат агенттігі.

Әкім Дінмұхаммедтің жас болса да, шұғыл әрі батыл, сауатты әрекет жасағанына ризашылығын білдірді. 

Интерн маман оқуын әрі қарай үш жылдық резидентурада жалғастыруды жоспарлап отыр. Аймақ басшысы елдің атынан алғыс ретінде Дінмұхаммед Бектұрғанның оқу ақысын төлеуге қолдау білдіретінін айтты.

Дінмұхамед медициналық көмекке мұқтаж азаматқа дер кезінде алғашқы жәрдем көрсетіп, өмірін сақтап қалды. Оның уақыт оздырмай қабылдаған шешімі, сауатты іс-қимылы өзі сияқты медицина мамандығында білім алатын жастарға үлгі-өнеге болды.Бұл арқылы Дінмұхамед өз мамандығын жақсы меңгергенін ғана емес, ата-анасынан, ұстаздарынан, аға буын әріптестерінен тағылымды тәрбие алғанын көрсетті, – деді Н.Нәлібаев.

Еске салайық, Дінмұхаммед Бектұрған Астана медицина университетінің 7- курс студенті. Қазір интернатурада оқиды.

Қысқа да нұсқа. Жазылыңыз telegram - ға