Ұшақ апатынан ұшқыш пен оның екі қызы аман қалды
АҚШ-тың Аляска штатында Piper PA-12 Super Cruiser жеңіл ұшағы апатқа ұшырап, бортта болған 38 жастағы ұшқыш пен оның екі қызы таңғажайып жағдайда тірі қалған, деп хабарлайды El.kz ақпарат агенттігі.
Бұл туралы New York Post басылымы хабарлады.
Оқиға Тустумена мұзды көлінің аумағында болған. Ұшақ апатқа ұшырағаннан кейін, ер адам мен оның екі қызы құтқарушылар келгенге дейін әуе кемесінің қанатында 12 сағат бойы отыруға мәжбүр болған. Ауа райы өте суық болғанымен, қыздардың киімі құрғақ болып, ауыр зардап шекпеген. Әкелеріне аздап суық тиген, бірақ өміріне қауіп жоқ.
207-ші авиациялық полктің командирі, подполковник Брендон Холбрук бұл оқиғаны:
«Бұл – ұшақ апатының ең бақытты аяқталған оқиғасы. Жағдай қайғылы аяқталуы әбден мүмкін еді», – деп бағалады.
Ұшақтың апатқа ұшырағанын алғаш болып куәгер – ұшқыш Терри Годесу байқаған. Ол оқиға орнында ұшақ қалдықтарын көріп, ешкім тірі қалмаған болар деп ойлағанын жасырмады. Алайда аман қалған отбасыны көргенде өзінің қатты таңғалғанын айтты.
Қазір ұшақ апатының себебі анықталып жатыр. Аман қалған жолаушыларға медициналық көмек көрсетілді. Бұл оқиға – төтенше жағдайда да үміт пен төзімділіктің үлгісі ретінде бағалануда
Қысқа да нұсқа. Жазылыңыз telegram - ға