Ұлттық банк қазақстандықтарға ескерту жасады
Қазақстан Ұлттық банкі қазақстандықтарға алаяқтық схемалар туралы ескерту жариялады, деп хабарлайды El.kz ақпарат агенттігі.
Алаяқтар мессенджерлерде Қазақстан Ұлттық банкінің немесе басқа мемлекеттік және құқық қорғау органдары қызметкерлерінің жалған аккаунттарын пайдаланады. Профильдің шынайы көрінуі үшін ресми ресурстарда орналастырылған суреттер мен логотиптерді қолданады, – делінген хабарламада.
Ұлттық банк мәлімдегендей, алаяқтар өздерін мессенджерлердің техникалық қолдау қызметінің өкілі ретінде таныстырып, аккаунтты өшіру туралы өтініштің берілгенін хабарлайды.
Бұл өтінішті жою үшін азаматтарға арнайы сайтқа кіру ұсынылады, ол жерде телефон нөмірін және келген хабарламаның бір реттік кодын енгізу керек. Осылайша, алаяқтар аккаунтқа қол жеткізіп, иесін бұғаттап тастайды. Одан кейін олар жалған немесе ұрланған аккаунттар арқылы туыстары мен таныстарына хат жазып, әртүрлі сылтаумен ақша аударуды, сілтемеге өтуді, қосымша жүктеуді, мессенджерде жаңа функцияны белсендіруді немесе жеке деректерді хабарлауды сұрайды, – деп көрсетілген ақпаратта.
Сондай-ақ, Ұлттық банк хабарлауынша, алаяқтар бұған қосымша түрде жалақысы жоғары, болашағы бар жұмыс ұсынатын хабарламаларды немесе QR-кодтарды көпшілік орындарда таратады. Пайдаланушы сілтемеге өткен жағдайда алаяқтар оның мессенджеріне, мобильді құрылғысына немесе жеке деректеріне қол жеткізе алады.
Ұлттық банк азаматтарды сақ болуға шақырады: құпия ақпаратты ешкімге бермеңіз, мессенджерлердегі немесе телефон арқылы келген күмәнді хабарламаларға сенбеңіз, ақпараттың шынайылығын тексеріңіз, ақшалай аударым жасамаңыз, бейтаныс сілтемелер мен файлдарды ашпаңыз және қашықтан басқару қосымшаларын жүктемеңіз, – делінген ескертуде.
Алаяқтардан қорғану үшін, егер сізге өздерін мемлекеттік орган немесе Ұлттық банк қызметкері ретінде таныстырғандар қоңырау шалса, сөйлесуді бірден тоқтатып, қажет болса, мемлекеттік органның ресми нөміріне өзіңіз хабарласуыңыз ұсынылады.
Егер сіз алаяқтық әрекеттерге тап болсаңыз, Қазақстан Республикасының құқық қорғау органдарына ресми арызбен жүгінуге кеңес береміз, – делінген Ұлттық банктің мәлімдемесінде.
Қысқа да нұсқа. Жазылыңыз telegram - ға