Үкіметте полиэтилен өндіретін зауыт салу жобасы талқыланды
Премьер-министр Әлихан Смайыловтың төрағалығымен өткен кеңесте газ-химия өнеркәсібін дамыту мәселелері қаралды, деп хабарлайды El.kz ақпараттық агенттігі.
Атап айтқанда, полиэтилен өндірісі бойынша интеграцияланған газ-химия кешенін салу жобасы талқыланды. Бұл мәселе бойынша соңғы инвестициялық шешім 2024 жылы қабылдануға тиіс.
«ҚазМұнайГаз» ҰК» АҚ басқарма төрағасы Мағзұм Мырзағалиевтың айтуынша, жобаны табысты іске асыру үшін «Ұлттық индустриялық мұнай-химия технопаркі» АЭА жұмыс істеу мерзімін ұзарту және жетіспей тұрған сыртқы инфрақұрылымды салу керек.
Талқылау қорытындысы бойынша премьер-министр уәкілетті органдарға көтерілген мәселелерді шешу жолдарын пысықтауды тапсырды.
Сонымен қатар Үкімет басшысы Қазақстан заңнамасы аясында шетелдік лицензияланған технологияларды пайдаланатын ірі мұнай-газ химия нысандарын жобалау және салу кезінде халықаралық стандарттарды қолдану мүмкіндігін қарастыру қажеттігі туралы айтты.
Қысқа да нұсқа. Жазылыңыз telegram - ға