Түркістанда биыл 125 мыңнан астам адамды жұмыспен қамту жоспарланып отыр

Түркістан облысында 2025 жылы «Өңірлік жұмыспен қамту картасы» аясында 125 мыңнан астам жұмыс орнын ашу жоспарланып отыр. Оның 40%-ы тұрақты жұмыс орындары болады деп күтілуде, деп хабарлайды El.kz ақпарат агенттігі.

«Еңбек» бағыты бойынша биыл 32 млрд теңге қарастырылған. Атқарылатын жұмыстардың нәтижесінде облыстағы жұмыссыздық деңгейі 4,8%-ды құрайды деген жоспар бар.

Өңірлік коммуникациялар қызметі ұсынған ақпаратқа сүйенсек, былтыр «Өңірлік жұмыспен қамту картасы» аясында  118 889 жұмыс орнын ашу жоспарланып, 108 725 жұмыс орны ашылған. Оның  62 892-сі тұрақты, 45 833-і уақытша.

Аз қамтылған азаматтарға әлеуметтік көмек көрсету жұмыстарына тоқталсақ, 2024 жылы 15,8 мың отбасыға (94,8 мың адам) 6 854,2 млн теңгеге атаулы әлеуметтік көмек тағайындалған. 2023 жылмен салыстырғанда аз қамтылған азаматтардың саны былтыр 63 мың адамға немесе 60,1%-ға азайды, ал кедейлік деңгейі 3% төмендеді. 
 
2025 жылы 76,2 мың адамды атаулы әлеуметтік көмекпен қамтамасыз етуге бюджеттен 10,6 млрд теңге бөлініп отыр екен. Нәтижесінде аз қамтылған азаматтар санын 2024 жылмен салыстырғанда 20 %-ға, ал кедейлік деңгейін 3,5 %-ға төмендету жоспарлануда. 

Қысқа да нұсқа. Жазылыңыз telegram - ға