Трамп TikTok-қа АҚШ-та жұмыс істеуге тағы 75 күн уақыт берді

АҚШ президенті Дональд Трамп 4 сәуір күні TikTok видеоплатформасының АҚШ аумағындағы жұмысын тағы 75 күнге ұзартатын жарлыққа қол қойды, деп хабарлайды El.kz ақпарат агенттігі.

TruthSocial желісіндегі парақшасында Трамп әкімшілігі "TikTok-ты сақтап қалу келісімі бойынша белсенді жұмыс істеп жатыр" және "үлкен ілгерілеуге қол жеткізді", алайда соңғы келісімге әлі де түзетулер қажет екенін жазды. TikTok-тың АҚШ-тағы бөлімшесін қытайлық иесі ByteDance компаниясы сатуы тиіс болған мерзім 5 сәуірде аяқталуы тиіс еді.

Трамп TikTok-тың АҚШ пен Қытай арасындағы өзара кедендік баж салығын төмендетуге бағытталған кең ауқымды келісімнің бір бөлігіне айналуы мүмкін екенін де меңзеді.

Қытаймен ынтымақтастықты жалғастырғымыз келеді. Олар біздің айна баж салығымызға (яғни, тең мөлшердегі кедендік алымдарға) риза емес екенін білемін... Бұл тарифтердің ұлттық қауіпсіздік үшін қаншалықты маңызды әрі тиімді экономикалық құрал екенін дәлелдейді, – деді Трамп.

Айта кетейік, 2 сәуірде Трамп Қытайдан әкелінетін тауарларға 34 пайыз мөлшерінде жаңа кедендік салық енгізді. Бұған дейінгі шаралармен бірге бұл тарифтер жалпы 54 пайызға жетеді. Қытай бұған жауап ретінде АҚШ өнімдеріне де 34 пайыздық баж салығын енгізді.

Қытай Қаржы министрлігі: "АҚШ-тың әрекеттері халықаралық сауда ережелеріне қайшы келеді, Қытайдың заңды құқықтары мен мүдделерін бұзады және бұл қорқытуға негізделген біржақты тәсілдің айқын мысалы", – деп мәлімдеді.

АҚШ билігі TikTok иесі ByteDance компаниясынан қосымшаның америкалық бөлімін сатуын талап етуде. Себебі, Қытай билігі бұл платформа арқылы америкалық қолданушылардың жеке мәліметтеріне қол жеткізе алады деген қауіп бар. Аталған заңға Трамптың алдындағы президент, демократ Джо Байден қол қойған болатын.

Қысқа да нұсқа. Жазылыңыз telegram - ға