Тәуелсіздік күніне орай Астанада қандай іс-шаралар өтетіні белгілі болды
Астанада Тәуелсіздік күніне орай 50-ден астам түрлі мерекелік және ресми іс-шаралар өтеді. Оның ішінде көрмелер, концерттер, сурет байқаулары, турнирлер мен спартакиадалар ұйымдастырылады. Қала әкімдігі іс-шаралардың тізімін жариялады, деп хабарлайды El.kz ақпарат агенттігі.
7-8 желтоқсан күндері №15 мектеп-лицейінде Сарыарқа ауданының оқушылары арасында шахмат пен дойбыдан турнир, 7-8 желтоқсанда Қалибек Қуанышбаев атындағы Қазақ ұлттық музыкалық драма театрында «Төрлет, еңбек адамы!» атты республикалық ақындар айтысы өтеді.
8 желтоқсан күні сағат 17:00-де елордалық филармонияның концерт залында ақын, филология ғылымдарының кандидаты, Л.Гумилев атындағы Еуразия ұлттық университетінің филология факультетінің деканы, «Құрмет» орденінің иегері Серікзат Дүйсенғазының «Ұлы дала жүрегі» атты шығармашылық кешін тамашалауға мүмкіндік бар.
Сол күні сағат 19:00-де Роза Бағланова атындағы «Қазақконцертте» Әміре концерті өтеді. Сонымен қатар Жастар театрында «Ақ кеме» қойылымының премьерасы ұйымдастырылады.
Әл-Фараби атындағы Оқушылар сарайында 10 желтоқсан күні республикалық поэтикалық жоба аясында «Ақындар айтысы» байқауын өткізу жоспарланып отыр.
11 желтоқсан күні сағат 19:00-де Музыкалық жас көрермен театрында «Гауһартас» спектаклі өтеді.
13 желтоқсанда бірнеше іс-шаралар жоспарланған. Мәселен, Maqsut Narikbayev University ғимаратында Тәуелсіздік күніне арналған оркестрдің концерті және «Тәуелсіздік – жастарға тағылым» атты дөңгелек үстел өтеді деп күтілуде.
14 желтоқсанда қала тұрғындары мен қонақтары үшін қызықты іс-шаралар өткізіледі. Бұл күні сағат 10:00-де «Қазанат» ипподромында қалалық жарыстар өтеді, ал №29 орта мектепте «Әкелер кеңесімен» бірлесіп, 5-11 сыныптар арасында футболдан турнир ұйымдастырылады. Сонымен қатар, Сарыарқа ауданы әкімінің аппаратында «Мен өз жетістіктерімді Отаныма арнаймын» челленджінің және қалалық, республикалық олимпиаданың жеңімпаздарымен кездесу жоспарланып отыр. Сол күні Е.Рахмадиев атындағы мемлекеттік академиялық филармония «Қоңыр үнді аманат» және «Ән салайық бәріміз» мерекелік концерттеріне шақырады.
М. Горький атындағы Мемлекеттік академиялық орыс драма театрында 15 желтоқсан күні «Әлия» спектаклі ұсынылады.
16 желтоқсанда Ә.Мәмбетов атындағы Мемлекеттік драма және комедия театрында жазушы, ақын және драматург Мұхтар Шахановтың «Танакөз» поэмасы бойынша спектаклі, 17 желтоқсан күні сағат 19:00-де Музыкалық жас көрермен театрында «Абай-Тоғжан» спектаклі өтеді. Сонымен қатар Тәуелсіздік мерекесіне орай, Байқоңыр ауданының көпбалалы және әлеуметтік аз қамтылған отбасыларының балаларына кинотеатрларға тегін бару, зейнеткерлердің ауласын қардан тазалауға көмектесу және азық-түлік тарату бойынша «Қамқорлық мекенжайы» акциясы өтеді. Жастар сарайының алаңында аудан тұрғындарына арналған мұзды қалашық ашылып, конькиден тегін сырғанау және қысқы спорт ойындары өткізіледі. Аудан ұйымдарының арасында үстел теннисінен турнир өткізу жоспарланып отыр.
Қысқа да нұсқа. Жазылыңыз telegram - ға