Талдықорғандағы кардиологиялық орталықта жыл басынан бері 3 мыңдай ота жасалды
Жыл басынан бері Талдықорғандағы кардиологиялық орталықта 3 мыңдай пациент ем қабылдап, ота жасатты, деп хабарлайды El.kz ақпарат агенттігі.
Талдықорғандағы облыстық кардиологиялық орталық жыл басынан бері орталықта 3 мыңға жуық пациент білікті ем қабылдап, ота жасатқан. Мұнда жоғары технологиялы құрылғылардың көмегімен жүрек пен қан тамырларына күрделі операциялар жасалады.
Мамандардың айтуынша, қан айналымы жүйесінің аурулары әлемде таралуы бойынша 1-ші орында тұр және бұл сырқат түрлері жылдам «жасаруда». Бұған көптеген факторлар әсер етеді: дұрыс тамақтанбау, экология, физикалық белсенділіктің болмауы, жаман әдеттер және т.б. Осыған байланысты облыстық кардиологиялық орталықта қан айналымы жүйесі аурулары бар науқастар санының жыл сайын артып отырғаны байқалады.
Мәселен, кардиологиялық орталық директорының айтуынша, жыл сайын медициналық мекеменің клиникалық-диагностикалық бөлімшесіне 20 мыңнан астам пациент қаралуға, кеңес алуға, УЗИ және басқа да тексерулер үшін жүгінеді.
Бізде МӘМС бойынша тегін негізде жыл сайын екі мыңға жуық коронарография операциясы жүргізіледі, интервенциялық кардиологиялық бөлімшеде мыңдаған пациенттерге стенттер орнатылады. Сонымен қатар электрокардиостимуляторларды имплантациялау бойынша 150-ден астам операция, 120-дан астам ИКД имплантациясы (кардиовертердефибрилятор), 50-ден астам күрделі қайта синхрондау құрылғыларын имплантациялау және жүрек ырғағын қалпына келтіру үшін 100-ге жуық операция, 400-ге жуық ашық жүрекке операция жасалады. Ашық жүрекке операция жасау - бұл коронарлық артерияларды, жүрек пен қолқа қақпақшасын ауыстыратын күрделі және жауапты процедура. Яғни, Талдықорғанда жүрек трансплантациясынан басқа барлық операциялар жасалады. Бұл ретте біз жұмысқа резидентурада оқып, оқуын аяқтаған дәрігерлерді ғана қабылдаймыз, - деп атап өтті облыстық кардиологиялық орталықтың директоры Нұрсан Сурашев.
Бүгінгі таңда Жетісу тұрғындары барлық хирургиялық интервенциялық көмекті Талдықорғанда ала алады. Айта кетейік, соңғы жылдары орталыққа Қазақстанның басқа қалаларынан келген пациенттер де жиі жүгіне бастады, сондай-ақ таяу шетелдерден келетін пациенттердің де саны артқан.
Қысқа да нұсқа. Жазылыңыз telegram - ға