Соғыс жылдарында қазақстандық өнерпаздар майданда 36 мыңнан аса концерт қойған
ІІ дүниежүзілік соғыс жылдарында мәдениет майдан мен тылда халықтың рухын көтеру ісінде маңызды рөл атқарды. Соғыс жылдары қазақстандық әртістер 36 525 концерт өткізіп, оларды 9 337 000 адам тамашалады. Бұл туралы ҚР Мәдениет және ақпарат министрі Аида Балаева Алматыда өткен «Жеңістің: ұрпақтар мен халықтардың бірлігі» конференциясында айтты, деп хабарлайды El.kz ақпарат агенттігі.
Конференция жұмысына ҚР Президенті Әкімшілігінің Ішкі саясат бөлімінің меңгерушісі Абзал Нүкенов, Ресей Федерациясы Президентінің шет елдермен аймақаралық және мәдени байланыстар жөніндегі басқармасы басшысының орынбасары Антон Рыбаков, Ресей Федерациясының Жастар ісі жөніндегі федералдық агенттігі басшысы Григорий Гуров, екі елдің ғалымдары мен сарапшылары, сондай-ақ белсенді жастар қатысты.
1943 жылы республикада қазақ айтысы қайта жанданып, ақындар жауынгерлер мен еңбеккерлердің ерлігін жырға қосты. Осы уақытта Қазақстанға эвакуацияланған 90-ға жуық жазушы қазақ әдебиеті қайраткерлерінің қатарын толықтырды. Олардың ішінде Алексей Толстой, Сергей Михалков, Фёдор Панферов, Константин Паустовский, Самуил Маршак, Михаил Зощенко және басқалары бар. Сондай-ақ, 90-ға жуық ақын-жазушы майданға аттанып, соғысқа қатысты.
Мемлекет мәдениетті тек қолдап қана қоймай, оны нысаналы түрде халық арасына таратты, оның қуатты рухани күшін Ұлы Жеңіске жетудің бір тетігі ретінде шебер пайдаланды әрі дамытуға күш салды. Қазақстандық сахна және музыка өнерінің шеберлері майданда зор сұранысқа ие болды. Арнайы жылжымалы концерттік бригадалар құрылып, олар майдан шебінде және госпитальдерде концерт қойды, – деді А. Балаева.
Сахнада тек бұрыннан танымал туындылар ғана қойылып қоймай, соғыс жылдарында тұңғыш премьералар да өтті. Мәселен, 1942 жылы Қазақстанда алғаш рет опера жанрындағы қойылым сахналанды. Оның авторы – Евгений Брусиловский, ал туынды «Гвардия, алға!» деп аталды.
1944 Ахмет Жұбанов пен Латиф Хамидидің «Абай» операсы сахнаға шықты. Бүгінде Наталья Сац есімін иеленіп отырған балалар мен жасөспірімдер театры (ТЮЗ) ашылды. Сол жылы композиторлар Мұқан Төлебаев, Евгений Брусиловский және Латиф Хамиди бірігіп, Қазақ КСР-інің алғашқы мемлекеттік әнұранын жазды.
Соғыс кезеңі Қазақстанның бейнелеу өнері үшін де маңызды кезең болды. Суретшілер 2 500-денастам кескіндеме, графика және мүсін туындыларын жасады. Бұл шығармаларда кеңес адамдарының майдан мен тылдағы патриотизмі, табандылығы, ерлігі мен қаһармандығы бейнеленді. Қазақстан кескіндемесі мен графикасының дамуына қосқан үлесі үшін Қазақ КСР Жоғарғы Кеңесі Президиумының шешімімен Әбілхан Қастеев пен Моисей Левинге «Қазақстанның халық суретшісі» атағы берілді.
Қысқа да нұсқа. Жазылыңыз telegram - ға