Сәресі ішудің қандай пайдасы бар?

Қазақстан Мұсылмандары Діни Басқармасы мамандары сәресі ішудің өзіндік берекеті мен артықшылықтары барын айтты, деп хабарлайды EL.kz ақпарат агенттігі.
Атап айтқанда:
1) Сәресін ішуге тұрған адамға Алла мен Оның періштелері салауат айтады. Пайғамбарымыз (оған Алланың салауаты мен сәлемі болсын):
«Расында, Алла және Оның періштелері сәресі ішкендерге салауат жолдайды», – деген.
2) Пайғамбарымыздың (оған Алланың игілігі мен сәлемі болсын) сүннеті орындалады;
3) Құлшылыққа күш-қуат береді. Пайғамбарымыз (оған Алланың салауаты мен сәлемі болсын);
«Күндізгі оразаларыңа сәресінің асын ішіп көмектесіңдер», – дейді.
4) Ширақтықты арттырады (белсенділік, энергия, т.б);
5) Аштықтан келетін нашар мінездің алдын алады;
6) Сəресі дұғаның ең қабыл болатын кезіне сәйкес келеді;
7) Сəресіде ниетті түзеп, ықыласты арттыруға мүмкіндік туады;
8) Сәресіне тұрған адам таң намазына ұйықтап қалмайды.
Сондықтан мұндай пайдалардан құр қалмас үшін сәресіне тұрған жақсы. Ал сәресі іше алмай қалып, ауыз бекіткен адамның оразасы дұрыс саналады.
