«Qazcontent» АҚ жасанды интеллектті медиаөндірісте қолдану бойынша эксперимент өткізді

Бүгін, 1 сәуірде «Qazcontent» АҚ медиа саласында жасанды интеллект (ЖИ) технологияларын кеңінен пайдалану бойынша бір күндік эксперимент өткізді. Бұл тәжірибе аясында El.kz ақпарат агенттігі жаңалықтарды өңдеу мен иллюстрациялар жасау үшін ЖИ құралдарын белсенді түрде пайдаланды.

Мемлекет басшысы Қасым-Жомарт Тоқаев Бурабайда өткен Ұлттық құрылтайда айтқан цифрлық технологиялар мен жасанды интеллектті кеңінен енгізу жөніндегі тапсырма берген болатын. Президент өз сөзінде елдің нақты прогреске тек заманауи цифрлық шешімдер арқылы қол жеткізе алатынын атап өткен еді.

ЖИ-дың дамуын біз сырттай бақылап қана қоймай, оны тәжірибеде қолдануға бел будық. El.kz – цифрлық платформа, сондықтан біз осы мүмкіндікті алғаш болып сынап көргіміз келді. Бүгінгі жаңалықтардың мәтіні, аудармалар көбіне ЖИ арқылы жасалды. Адам тарапынан тек финалдық бақылау ғана болды. Бұл — технологияның нақты мүмкіндігін көрсету үшін жасалған тәжірибе. Бүгінгі жоба — соның нақты нәтижесі, – деді «Qazcontent» АҚ басқарма төрайымы Айна Задабек.

Акционерлік қоғам сарапшыларының пікірінше, медиа саласында жасанды интеллектті қолдану – бұл саланың табиғи даму кезеңі. ЖИ шаблонды, техникалық міндеттерді өз мойнына алып, редакторлар мен журналистерге аналитикалық және креативті материалдар жасауға мүмкіндік береді.

«Qazcontent» ұжымы жасанды интеллектті адам әлеуетін күшейтетін құрал ретінде қарастыруда. Кез келген ұсақ жұмыстардан босап, шығармашылыққа көңіл бөлу – сапалы, мазмұнды журналистиканың алғышарттары.

Эксперимент сәтті өтіп, жақсы нәтижелер көрсеткен соң, компания алдағы уақытта өз медиа жобаларында жасанды интеллектті кеңінен қолдануды жоспарлап отыр.

Қысқа да нұсқа. Жазылыңыз telegram - ға