Қазақстандық оқушылар EJOI-2024 олимпиадасында 4 медаль жеңіп алды
![Қазақстандық оқушылар EJOI-2024 олимпиадасында 4 медаль жеңіп алды Қазақстандық оқушылар EJOI-2024 олимпиадасында 4 медаль жеңіп алды](/storage/storage/element/2024/08/20/mainphoto/117810/1200xauto_99HY8Kbdi2KdLm9ZbnbeA22XE9DMNVCoyzBvwRy7.jpg)
Қазақстандық оқушылар EJOI-2024 информатикадан еуропалық жасөспірімдер олимпиадасында екі алтын, күміс және қола медаль жеңіп алды, деп хабарлайды El.kz ақпарат агенттігі.
Молдовада EJOI-2024 информатикадан еуропалық жасөспірімдер олимпиадасы өз мәресіне жетті.
Оқу-ағарту министрлігі биыл бұл жарысқа 50 елден келген 200-ге жуық оқушы қатысқанын айтты. Олимпиада екі күнге созылды. Қатысушылар күн сайын үш тапсырмадан орындаған, әр жинақ үшін төрт сағат қана берілді.
Қазақстан құрамасы 100% нәтиже көрсетіп, төрт медаль жеңіп алды. Олар:
Алтын медаль – Мансұр Мамадахунов, Қызылорда облыстық С. Шаухаманов атындағы «Білім-Инновация» дарынды балаларға арналған лицей-интернатының 9-сынып оқушысы.
Алтын медаль – Жан Анри, Алматы қаласындағы «Республикалық физика-математика мектебінің» 9-сынып оқушысы.
Күміс медаль – Исатай Исмағзи, Талдықорған қаласындағы дарынды балаларға арналған «Білім-Инновация» лицей-интернатының 9-сынып оқушысы.
Қола медаль – Арнұр Нұрғазин, Семей қаласындағы ФМБ НЗМ-нің 8-сынып оқушысы.
Команданы дайындаған жетекшілер: ACM бас бапкері, халықаралық және республикалық олимпиадалардың жеңімпазы Темірлан Сатылханов, Назарбаев Университетінің студенті, халықаралық олимпиадалардың жеңімпазы Альтаир Ашуров.
Естеріңізге салсақ, өткен жылы EJOI-2023 олимпиадасында біздің жас бағдарламашыларымыз бір алтын, екі күміс және бір қола медаль жеңіп алған болатын.
![Telegram](https://el.kz./static/site/images/tel26.png)