Қазақстандық гимнасттар жаңа маусымға қарқынды дайындалуда
Спорттық гимнастикадан Қазақстан ерлер құрамасы жаңа маусымның алғашқы жарыстарына белсенді дайындық жүргізуде, деп хабарлайды El.kz ақпарат агенттігі.
ҰОК мәліметінше, бас бапкер Александр Кимнің басшылығымен команда 2024 жылдың желтоқсанында Алматы қаласындағы СДЮШОР-9 алаңында жаттығуды бастаған. Жақында аяқталған оқу-жаттығу жиынына команданың көптеген көшбасшысы қатысты.
Бас бапкердің айтуынша, құрам өткен олимпиадалық циклден (2021–2024) сақталып қалған. Сонымен қатар команда екі дарынды жас спортшымен толыққан – Павлодардан келген Нуртан Идрисов пен Роман Хегай. Роман – жастар арасындағы Азия чемпионатының жеңімпазы, ал Нуртан – осы жарыстардың бірнеше мәрте жүлдегері.
Қазіргі уақытта команда Қатардың Доха қаласында оқу-жаттығу жиынын өткізуде. Бұл қала биылғы маусымда өтетін Әлем кубогының алты кезеңінің бірін қабылдайды.
"Команданың негізгі құрамы Дохадағы оқу-жаттығу жиынында Әлем кубогы кезеңдеріне дайындық үстінде. Мұнда өте жақсы жағдай жасалған. Сонымен қатар Қатар астанасы биылғы маусымдағы алты лицензиялық кезеңнің бірін өткізетін орын болмақ. Бірінші Әлем кубогы кезеңі Германияның Котбус қаласында өтеді. Одан кейін он күннен соң Әлем кубогы кезеңі Әзірбайжанның Баку қаласында ұйымдастырылады", – деп атап өтті команданың бас бапкері Александр Ким.
Алғашқы екі кезеңде келесі гимнасттар өнер көрсетеді:
- Милад Карими (еркін жаттығу, кермедегі жаттығу)
- Дмитрий Патанин (еркін жаттығу, шығыршық және қоссырықтағы жаттығу)
- Ильяс Азизов (ат снаряды, шығыршық және кермедегі жаттығу)
- Зейнолла Идрисов (ат снарядындағы жаттығу).
Александр Кимнің айтуынша, алғашқы кезеңдерге Қазақстан құрамасынан тек жаңа ережелерге сай комбинацияларын сақтап қалған спортшылар ғана қатысады.
Айта кетейік, алғашқы екі кезеңге 2024 жылғы Олимпиада ойындарының күміс жүлдегері Нариман Құрбанов қатыспайды.
"Нариман мен Зейнолла Прага (Чехия) қаласындағы гимнастика базасында жеке дайындық жоспарымен жаттығуда. Құрбанов әлі толық қалпына келген жоқ. Ол Әлем кубогының үшінші кезеңіне (Анталья, Түркия) жаңа бағдарламасын дайындап жатыр. Ол құрама сапында, бірақ жарысқа наурыз айынан бастап қатысады. Біз сол уақытқа дейін оның қажетті спорттық деңгейге жететінін жоспарлап отырмыз", – деп мәлімдеді Александр Ким.
Бірінші Әлем кубогы кезеңі Германияның Котбус қаласында 20-23 ақпан аралығында өтеді. Келесі кезеңді Әзірбайжанның Баку қаласы 6-9 наурыз аралығында қабылдаса, ал Түркияның Анталья қаласында жарыс 20-23 наурыз аралығында ұйымдастырылады.
Қысқа да нұсқа. Жазылыңыз telegram - ға