Қарттар үйінің директоры мен бухгалтері 80 млн теңгені жымқырған
Атырау облысы Жылыой аудандық соты сеніп тапсырылған мүлікті иемденгені және талан-таражға салғаны үшін басқарма орталығы есепшісі мен директорын кінәлі деп таныды, деп хабарлайды El.kz ақпарат агенттігі.
Сотта мемлекеттік функцияларды орындауға уәкілеттік берілген адам бола тұра, аса ірі мөлшерде сеніп тапсырған мүлікті иемденіп алып, талан-таражға салғаны үшін айыпталған Ж.-ға (ҚК-тің 189-бабының 3-бөлігінің 1,2-тармағы) және Ш.-ға (ҚК-тің 189-бабының 3-бөлігінің 1,2 тармақтары, 189-бабының 4-бөлігінің 2-тармағы) қатысты қылмыстық іс қаралды.
Сот Ш. Атырау облысы Жұмыспен қамтуды үйлестіру және әлеуметтік бағдарламалар басқармасының №2 Арнаулы әлеуметтік қызметтер көрсету орталығының бас есепшісі және уақытша мекеме директоры міндетін атқарушы бола тұра, 2021-2022 жылдары өзінің және таныстарының банк есепшоттарына 73 млн теңгеден астам қаражат аударғанын анықтады. Осылайша ол аса ірі мөлшерде сеніп тапсырылған мүлікті иемденіп, талан-таражға салған, - делінген мәліметте.
Сонымен қатар Ж. орталық директоры бола тұра, 2022-2024 жылдары өзінің және таныстарының банк есепшоттарына аудару жолымен сеніп тапсырылған мүлікті ірі мөлшерде 6 млн теңгеден астам сомаға иемденіп, талан-таражға салған.
Прокурор сотталушы Ш.-ға – 6 жыл 8 ай, Ж.-ға 3 жыл 6 ай мерзімге бас бостандығынан айыру жазасын тағайындауды сұрады.
Жәбірленуші Ш.-ға 60 млн астам теңгеге талап қоюын қанағаттандырып, заң шеңберінде жаза тағайындауды сұрады.
Сотталушылар өз кінәларын мойындады.
Сот шешімі
Жазаны жеңілдететін мән-жай ретінде:
Ш.-ның кінәсін мойындауы, бұрын сотты болмағаны, әрекетіне өкінуі, залалды ішінара өтеуі,
Ж.-ның кінәсін мойындауы, әрекетіне өкінуі, залалды толық көлемде өтеуі, бұрын сотты болмағаны, тергеуге жәрдем көрсетуі, отбасылық жағдайы (жалғыз басты ана) танылды.
Ауырлататын мән-жайлар анықталмады.
Сотталушылар тағылған айыптар бойынша кінәлі деп танылды.
Ш.-ға мемлекеттік қызметте және квазимемлекеттік ұйымдарда лауазымдарды атқару құқығынан өмір бойына айыра отырып, 7 жыл мерзімге бас бостандығынан айыру жазасы тағайындалды.
Ж.-ға ҚК-тің 55-бабының 4-бөлігін қолданумен мемлекеттік қызметте және квазимемлекеттік ұйымдарда лауазымдарды атқару құқығынан өмір бойына айыра отырып, 3 жыл 6 ай мерзімге бас бостандығын шектеу жазасы тағайындалды.
Қысқа да нұсқа. Жазылыңыз telegram - ға