Президент: Қазақстан шет елдерден инвестиция тарту бойынша Орталық Азияда көш бастап тұр

Қазақстан президенті Ауыл шаруашылығы еңбеккерлерінің бірінші форумында елімізде инфляция деңгейі төмендегінін айтты, деп хабарлайды El.kz ақпарат агенттігі.

Жүйелі жұмыстардың нәтижесінде инфляция деңгейі төмендеді (биылғы қазан айында жылдық инфляция 8,5 пайызды құрады), сондай-ақ ұлттық экономиканың өсімі 2024 жылдың қаңтар-қазан айларында 4 пайыздан асып, жақсы қарқын алды. Мұнайдан тыс салаларды дамыту арқылы оң динамика байқалады. Бұл – маңызды үдеріс. Ішкі жалпы өнім өсімінің үштен екісінен астамы сауда, өңдеу өнеркәсібі, құрылыс пен ауыл шаруашылығына тиесілі. Осы бағыттағы белсенді жұмысты жалғастыру керек, - деді Тоқаев.

Мемлекет басшысы Қазақстанның несие рейтингі инвестициялық сенімділік деңгейінде тұрғанын да қоса кетті.

Қазақстан шет елдерден тікелей инвестиция тарту бойынша Орталық Азияда көш бастап тұр. Биыл жетекші халықаралық рейтинг агенттіктері Қазақстанның қазіргі несие рейтингі инвестициялық сенімділік деңгейінде тұрғанын растады. Қыркүйекте Moody’s агенттігі Қазақстанның ұзақмерзімді рейтингін «Тұрақты» деңгейіне көтерді. Бұл – Тәуелсіз Қазақстан тарихындағы ең үздік нәтиже, - деді президент.

Қысқа да нұсқа. Жазылыңыз telegram - ға