Павлодар облысында үздік педагогтар марапатталды
Бүгін облыс әкімі Асайын Байханов «Ұлағат-2024» салтанатты іс-шарасына қатысты. Өңір басшысы ұстаздарды құттықтай отырып, Павлодар облысы білім сапасы бойынша әрқашан үздіктердің қатарында екенін атап өтті, деп хабарлайды El.kz ақпарат агенттігі.
Біздің аймақ сіздер негізгін қалаған білім беру әлеуетімен мақтанады. Бізде таланты мен кәсібилігін оқушыларының жетістіктерімен дәлелдеген көптеген дарынды ұстаздар бар, - деді Асайын Байханов.
Өңір қоржынында халықаралық деңгейдегі 30-дан астам медаль бар. Биылғы жылы өңірдің мектеп олимпиадалық құрамасы республикалық олимпиадада жалпыкомандалық есепте 1 орын алып, «Үздік олимпиадалық команда - 2024» атағына ие болды.
Әкімдік мәліметінше, өңір басшысы облыс әкімдігінің 20 мыңнан астам педагог жұмыс істейтін білім беру саласына қолдау көрсетуді жалғастыратынын атап өтті. Соңғы екі жылда облыстың 76 мектебінде 82 пәндік кабинет жаңартылды, 4 мектеп пен қосымша білім беру орталығы ашылды, 66 білім беру нысаны жөнделді.
Сондай-ақ облыс әкімі үздік білім беру жүйесін қалыптастырған педагогикалық еңбек ардагерлеріне де алғысын білдірді.
Салтанатты жиында Асайын Байханов 71 ұстазға облыстық және бейіндік наградалар табыс етті. Облыс әкімінің алғыс хаттары мен грамоталары облыстың 10 педагогына табысталды.
«Павлодар облысының білім беру саласына қосқан үлесі үшін» төсбелгісімен және 1000 АЕК мөлшерінде сыйақымен 11 педагог марапатталды. Оқу-ағарту министрлігі елеулі еңбегі үшін өңірдің 29 мұғалімін Ыбырай Алтынсарин медалімен марапаттады, - делінген мәліметте.
Білім беру саласының бірқатар қызметкерлері «Облыс алдына сіңірген еңбегі үшін», «Еңбек ардагері» төсбелгілерін, ҚР Оқу-ағарту министрлігінің Құрмет дипломдарын алды.
Биылғы жылы «Жыл мұғалімі - 2024» конкурсының облыстық кезеңінде 20 ұстаз сынға түсті. Конкурсқа қатысушылар бейтаныс сыныптарда сабақ беріп, педагогикалық жобаларын қорғады. Нәтижесінде облыстық «Жыл мұғалімі - 2024» конкурсының бас жүлдесін Екібастұз қаласының Қ. Сәтбаев атындағы дарынды балаларға арналған мамандандырылған гимназияның қазақ тілі мен әдебиеті пәнінің мұғалімі Ақмарал Есенғожина жеңіп алды. «Мектепке дейінгі ұйымның үздік педагогы» атағы Павлодар қаласының № 8 балабақшасының қызметкері Мақпал Сырымбаеваға берілді.
Мараппаттау бағдарламасы оқушылар сарайы мен музыкалық колледж тәрбиеленушілерінің мерекелік концертімен аяқталды.
Қысқа да нұсқа. Жазылыңыз telegram - ға