Өзбекстаннан Қазақстанға болжанған көлемнен артық су келді
2024 жылдың қазан айынан бері Өзбекстаннан Қазақстанға болжанған көлемнен 1,7 млрд текше метрге артық су келді, деп хабарлайды El.kz ақпарат агенттігі.
Өзбекстанда өтіп жатқан «Орталық Азия — Еуропалық Одақ» саммиті аясында Мемлекет басшысы Қасым-Жомарт Тоқаевтың және Өзбекстан, Қырғызстан, Тәжікстан, Түрікменстан Президенттерінің, Еуропалық Кеңес Төрағасы Антониу Кошта мен Еуропалық комиссия Төрағасы Урсула фон дер Ляйеннің қатысуымен Самарқанд халықаралық климаттық форумы өтті.
Форумның үшінші пленарлық сессиясында Су ресурстары және ирригация министрі Нұржан Нұржігітов сөз сөйледі. Министр климаттық өзгерістерге бейімделу, су ресурстарын басқарудың жаңа тәсілдерін енгізу, сондай-ақ су тапшылығы мәселесін бірлесіп шешу үшін өңірлік ынтымақтастықты нығайтудың маңызына тоқталды.
Еске сала кетейік, екіжақты су ынтымақтастығын нығайту жөніндегі бірлескен жұмыс тобының XII отырысында Нұржан Нұржігітов пен Өзбекстан Су шаруашылығы министрі Шавкат Хамраев 2024 жылдың қазанынан 2025 жылдың қазанына дейін Қазақстанға 16 млрд текше метрден артық су жіберіледі деп келіскен болатын.
Өткен жылдың 1-ші қазанынан 1-ші сәуірге дейін Түркістан облысының Шардара су қоймасына 12,6 млрд текше метрден астам су түсті. Бұл бастапқыда болжанған көлемнен 1,7 млрд текше метрге артық.
Солтүстік Арал теңізіне шамамен 1,8 млрд текше метр су жіберілді, бұл жоспарланған көлемнен 120 млн текше метрге артық. Ал, «Достық» мемлекетаралық каналы арқылы Қазақстанға 490 млн текше метр су келді.
Бұл су суару кезеңінде еліміздің оңтүстігіндегі шаруаларды қамтамасыз ету үшін пайдаланылады. Су дипломатиясы және халықаралық ынтымақтастық - біздің министрлік жұмысының негізгі бағыттарының бірі. Трансшекаралық суларды бөлу және басқару, тәжірибе алмасу, озық технологияларды бірлесіп енгізу бүкіл Орталық Азияның су қауіпсіздігін қамтамасыз етуде маңызды рөл атқарады, – деді Су ресурстары және ирригация министрі Нұржан Нұржігітов.
Қысқа да нұсқа. Жазылыңыз telegram - ға