Оқу-ағарту министрі Абай облысының педагогтарымен кездесті
ҚР Оқу-ағарту министрі жұмыс сапарымен Абай облысының Аягөз, Үржар және Жарма аудандарының педагогтерімен кездесулер өткізді, деп хабарлайды Еl.kz ақпарат агенттігі.
Ғани Бейсембаев кездесу кезінде әсіресе, сапалы білім беру мен кәсіби дамуды қамтамасыз етудің негізгі бағыттарына және ПББ (педагогтердің білімін бағалау) өткізу ережелеріндегі өзгерістерге баса назар аударды.
Министрлік «Білім беру өзгерістерінің 1000 көшбасшысы» кадрлық резервін қалыптастыру бойынша кешенді жұмыстар жүргізуде. Басты мақсат – педагогтер бойында тұлғалық, кәсібилік, басқарушылық, сараптамалық дағдылар мен құзыреттерді дамыту. Бағдарламаға психологиялық тестілеу енгізіліп отыр, ол жас педагогтердің, болашақ көшбасшылардың тұлғалық түрін, табыстылығын анықтауға мүмкіндік береді, - деді министр.
Бұған дейін VIII шақырылымдағы Парламент Мәжілісінің бірінші сессиясының ашылуында Мемлекет басшысы педагогтер үшін ПББ ережесін оңайлатуды ұсынған болатын. Қазіргі таңда министрлік мұғалімдерді аттестациялау жүйесін жетілдіру бойынша бірқатар жұмыстар атқарып жатыр. «Оқыту әдісі» бағыты мен портфолио қалыптастыру процесі қайта қаралатын болады.
Қазіргі уақытта Абай облысында 12 мыңнан астам педагог қызмет етеді. Оның ішінде 2000-нан астам педагог-зерттеуші, 95 педагог-шебер бар.
Сондай-ақ Ғани Бейсембаев жоспардан тыс Абай облысының орталығынан шалғайда жатқан елді мекендерде болып, білім беру ұйымдарын аралады. Олардың бірі - Жарма ауданындағы Аршалы негізгі мектебі. Облыс орталығынан 280 шақырым қашықтықта орналасқан бұл мектепте 70 оқушы, 19 мұғалім бар.
Министр ат басын бұрған білім беру ұйымдарының арасында І.Жансүгіров атындағы Үржар орта мектебі, «Ер Төстік» мемлекеттік балабақшасы, Таскескен ауылындағы Үржар колледжі, Шынқожа батыр атындағы жалпы орта мектеп және Аягөз ауданындағы №3 жалпы орта мектеп бар.
Ол балалардың қауіпсіздігін қамтамасыз ету бағытындағы жұмыстармен, мектеп дәретханаларының жағдайымен, мектептің материалдық-техникалық жабдықталуымен және тамақтандырудың ұйымдастырылуымен танысып, оқушылар үшін жайлы жағдай жасау, білім ұйымдарын дамыту бойынша бірқатар тапсырмалар берді.
Алда Абай облысының әкімдігімен бірлесіп білім беру ұйымдарындағы проблемалық мәселелерді шешу бойынша нақты қадамдарды қамтитын білім беру жүйесін дамытудың өңірлік жол картасы қабылданатын болды.
Қысқа да нұсқа. Жазылыңыз telegram - ға