Онлайн курс сатып алған астаналық 2 млн теңгеге алданып қалды
Астана қаласының тұрғыны интернеттегі онлайн курсқа жазылып, алаяқтың құрбанына айналды, деп хабарлайды El.kz ақпарат агенттігі.
Жас жігіт өзін кәсіби маман ретінде таныстырып 25 жастағы жәбірленушіге шаш үлгілерін жасау бойынша онлайн курс ұсынған. Сонымен қатар ол шетелдермен киім саудасын жүргізуге көмектесетінін мәлімдеген. Алаяқ өз курсына қызығушылықты арттыру үшін төрт дана шашқа арналған аппаратты сыйлыққа беретінін айтқан. Сеніміне кірген жәбірленуші алаяқтың есепшотына шамамен 2 миллион теңге көлемінде қаражат аударған.
Курстың екі күннен кейін басталатынын естіген жәбірленуші оны бір апта бойы күтіп, ақыры алданғанын түсінеді. Ол бірден полицияға жүгінеді. Алматы ауданының полиция басқармасы криминалдық полиция бөлімінің қызметкерлері күдіктіні анықтап, ұстады. Тергеу барысында бұл алаяқтықтың жалғыз оқиға емес екені белгілі болды.
Күдіктінің осындай тәсілмен тағы он адамды алдап, олардың қаржысын иемденгені анықталды. Қазіргі таңда алаяқтық ісі бойынша сотқа дейінгі тергеу амалдары жүргізілуде. Полиция департаменті азаматтарды интернеттегі ұсыныстарға сақтықпен қарап, алдын ала тексерусіз бейтаныс адамдарға ақша аудармауға шақырады.
Қысқа да нұсқа. Жазылыңыз telegram - ға