Оксфордта қазақ тілі оқытыла бастайды
Бұл жаңалықты әлеуметтік желіде ғылым және жоғары білім министрі Саясат Нұрбек бөлісті, деп хабарлайды El.kz ақпарат агенттігі.
ҚР Ғылым және жоғары білім министрлігі мен Oxford келісімге қол қойылды. Оған сәйкес Oxford университетінде қазақ тілін оқытуды бастау жоспарланған.
Тіл – халқымыз үшін үлкен құндылық. Бүгін қазақ-ағылшын тілдеріндегі Oxford Qazaq сөздігін таныстыра отырып, біз жаңа тарихи босағадан аттап жатырмыз. Соның арқасында әлемде біздің мәдениетіміз бен халқымыз туралы көбірек білетін болады. Біз қазақ тілін қағаз жеткізгіштер арқылы ғана дамытып жатқан жоқпыз, мемлекеттік тілді цифрландыру арқылы да белсенді түрде дамытып жатырмыз, - деді министр.
Естеріңізге сала кетейік, 2023 жылдың соңында қазақ-ағылшын тілдеріндегі Oxford Qazaq сөздігі шықты. Бірінші басылым 60 мыңнан астам сөзден және 1300 беттен тұрады. Ол Ахмет Байтұрсынов атындағы Тіл білімі институтының мамандарының қатысуымен 4 жыл бойы жазылды. Онда екі тілдің лексикасындағы ағымдағы өзгерістерді, соның ішінде қазіргі мәдениет пен ғылым саласындағы жаңалықтар ескерілді.
Қысқа да нұсқа. Жазылыңыз telegram - ға