Назарбаев «Барыс» автобазарынан айырылды: сот шешімі күшінде қалды
Апелляциялық инстанция «Барыс» автотұрағы орналасқан жерді мемлекетке қайтару туралы сот шешімін күшінде қалдырды. Бұл туралы Алматы облыстық сотына сілтеме жасай отырып El.kz ақпарат агенттігі хабарлайды.
Сот баспасөз қызметінің мәліметінше, азаматтық істер жөніндегі апелляциялық алқа оның заңдылығы мен негізділігіне байланысты бірінші сатыдағы соттың шешімін өзгеріссіз қалдырды.
Бұған дейін айтылғандай, әңгіме тұңғыш президент Нұрсұлтан Назарбаевтың інісі Болат Назарбаевқа тиесілі «Барыс» автотұрағы орналасқан 37,6 гектар жер жайлы. 2004 жылдан 2019 жылға дейін мемлекеттік жерлерді Қарасай ауданы мен Қаскелең әкімдіктері, сондай-ақ ауданның жер қатынастары бөлімі жеке меншікке бергені атап өтілді. Жер учаскелерін сатып алу-сатудың жеті шарты жасалған.
Осы жылдың наурыз айында Қарасай ауданының прокуратурасы бұл мәмілелерді жарамсыз деп тануды талап етті. Сот материалдарды зерттеп, қадағалау органының талабын қанағаттандырды. Жауапкер сот шешімімен келіспей, қанағаттандырылмаған апелляциялық шағым берді.
Бұған дейін Алматы облысындағы бүтін бір ауыл Болат Назарбаевтың ықпалымен тағайындалған әкімнің шешімімен бір отбасының меншігіне айналғанын жазғанбыз.
Қысқа да нұсқа. Жазылыңыз telegram - ға