Наурызда ҰБТ-ны 21 мыңға жуық талапкер тапсырып үлгерді
Наурыз айындағы Ұлттық бірыңғай тестілеудің бірінші аптасында 21 мыңға жуық талапкер сынақ тапсырды, деп хабарлайды El.kz ақпарат агенттігі.
Ғылым және жоғары білім министрлігінің ақпаратынша, олардың 57%-ы шекті баллдан өтті, ал орташа көрсеткіш – 53 балл болды. Ең жоғары нәтиже – 135 балды Абай облысының бір түлегі жинады.
Тестілеуге қатысқандардың 62,8%-ы қазақ тілінде, 37%-ы орыс тілінде, ал 52 адам ағылшын тілінде тапсырды. Ең көп таңдалған пән комбинациясы – «Математика-Физика» (18,4%), одан кейін «Шығармашылық емтихан» (16,1%) және «Биология-Химия» (12%). Ал ең аз сұранысқа ие болған комбинация – «Химия-Физика», оны небәрі 35 адам таңдаған, — делінген хабарламада.
ҰБТ кезінде ерекше білім беру қажеттіліктері бар 69 талапкерге арнайы жағдай жасалды. Сонымен қатар тестілеу нәтижелері 22 талапкер үшін жойылды. Оның ішінде 10 адам тыйым салынған заттарды – смартфондар мен шпаргалкаларды алып кіруге тырысқаны үшін тест тапсыру мүмкіндігінен айырылды, ал 12 талапкер аудиторияда тәртіп бұзғаны үшін шығарылды. ҰБТ-ны басқа адам тапсыруға тырысқан фактілер тіркелген жоқ.
Қысқа да нұсқа. Жазылыңыз telegram - ға