«Меломанның» болашағы: Aqniet Group культтік желіні қалай дамытып жатыр
Өткен жылдың соңында Қазақстандағы ритейл нарығында «Меломан-Marwin» дүкендер желісі Aqniet Group компаниясына сатылған, деп хабарлайды El.kz ақпарат агенттігі.
Культтік дүкендер желісін не күтіп тұрғаны жайында Aqniet Group-тың маркетинг жөніндегі директоры Салтанат Нұржанова Forbes Kazakhstan YouTube арнасына берген сұхбатында айтты.
«Меломанда» не өзгереді?
Желінің иелері ауысқан соң қоғамда үлкен резонанс пен түрлі болжамдар пайда болды. Көпшілігі «Гарри Поттерге» арналған коллекциялық өнімдер, сувенирлер мен тәттілер сөрелерден жоғалып кетеді деп ойлады. Алайда, Салтанат Нұржанова бұл қауесетті жоққа шығарып, ассортимент сол күйінде қалатынын, тек кейбір тауарлар маусымдық сұранысқа байланысты уақытша болмай қалуы мүмкін екенін айтты.
«Гарри Поттер» тауарлары мен оған арналған сувенирлер әлі де сатылымда. Бірақ бұл өнімдер маусымдық сипатқа ие, әсіресе қыркүйек пен қаңтар аралығында сұраныс жоғарылайды.
Ал шын мәнінде өзгеретін нәрсе – пайдасы аз кейбір тауарлардан бас тарту, мысалы, Таро карталары.
«Кей тауарларды сақтау құны біз олардан ала алатын маржаны жаппайды», – деп түсіндірді Салтанат Нұржанова.
Музыкалық бағытты дамыту
«Меломанның» басты бағыттарының бірі – музыка болып қала береді. Винил пластинкалар сатылымда болады, тіпті олардың ассортименті кеңейтіледі. Сонымен қатар, лаунж-аймақтар ашылады, онда келушілер пластинкаларды таңдап қана қоймай, музыка тыңдап, кітап оқып, демала алады. Қызығы, «Меломан» – Қазақстанда винил жазып, шығаратын жалғыз компания. Бұл Meloman Publishing аясында жүзеге асады.
Біз жас қазақстандық орындаушылармен жұмыс істейміз және биыл бірнеше релиз жоспарладық, – деді Салтанат Нұржанова.
Сонымен қатар, Meloman Publishing бірнеше кітап шығаруды да жоспарлап отыр.
Жаңа нарықтарға шығу
«Меломанның» дамуының келесі кезеңі – басқа елдердің нарығына шығу. Aqniet Group маркетинг жөніндегі директорының айтуынша, желі Өзбекстан мен Әзербайжан нарығына шығуды көздеп отыр.
Ташкентте бізде бірнеше жоба іске қосылған, жергілікті аудиториядан жақсы кері байланыс алдық. Бұл – Орталық Азиядағы ең жылдам өсіп жатқан нарық. Бакуде де бізде тәжірибе мен сенімді серіктестер бар, – деді ол.
Жаңа серпін, мәдениет пен тұтынушы трендтері
Aqniet Group тек «Меломанның» дәстүрлерін сақтап қоймай, желінің дамуына жаңа серпін беруде.
Басты тауар санаттарын сақтау, музыкалық бағытты кеңейту және географияны ұлғайту – «Меломанды» жай ғана дүкен емес, Қазақстанда және шетелде тұтынушылық трендтерді қалыптастыратын мәдени орталыққа айналдырып отыр.
Қысқа да нұсқа. Жазылыңыз telegram - ға