Мәжіліс сайлауына 100-ге жуық халықаралық байқаушы тіркелді
Бұл туралы ОСК мәлім етті
Орталық сайлау комиссиясының Төрағасы Нұрлан Әбдіровтің Тәуелсіз Мемлекеттер Достастығына қатысушы мемлекеттердің Парламентаралық Ассамблеясының байқаушылар тобымен кездесуі өтті. Бұл топ Қазақстан Республикасы Парламенті Мәжілісі депутаттарының кезектен тыс сайлауына дайындық пен оны өткізу мониторингін жүзеге асырады, деп хабарлайды El.kz ақпараттық агенттігі.
Нұрлан Әбдіров ТМД ПАА байқаушыларын жаңартылған заңнама бойынша жүргізілетін Қазақстан Республикасы Парламенті Мәжілісінің депутаттарын сайлау жөніндегі ағымдағы сайлау науқанының негізгі кезеңдерімен таныстырды.
Бұдан басқа, ОСК Төрағасы кездесуге қатысушыларды партиялық тізімдерді тіркеу қорытындылары, жеребе тартудың нәтижелері, сондай-ақ Парламент Мәжілісінің депутаттығына бірмандаттық аумақтық сайлау округтері бойынша сайланатын кандидаттарды тіркеу қорытындылары туралы хабардар етті.
Өз кезегінде, ТМД ПАА делегациясының басшысы Дмитрий Кобицкий кездесуді ұйымдастырғаны үшін алғысын білдіріп, қазіргі уақытта ТМД ПАА байқаушылар тобын қалыптастыру жалғасып жатқанын атап өтті. Оған кемінде 50 адам, оның ішінде ТМД-ға қатысушы мемлекеттер парламенттерінің депутаттары, ТМД ПАА Кеңесі Хатшылығының қызметкерлері және сайлау процестері саласында кәсіби білімі бар сарапшылар кіреді деп жоспарлануда.
Ол сондай-ақ ТМД ПАА байқаушылар тобының үйлестірушісі болып Армения Республикасы Ұлттық Жиналысының Өңірлік мәселелер және еуразиялық интеграция мәселелері жөніндегі тұрақты комиссиясы төрағасының орынбасары, Армения-Қазақстан парламенттік достық тобының жетекшісі Вагаршак Акобян тағайындалғанын хабарлады.
Делегация басшысы ТМД ПАА-дан халықаралық байқаушылар тобы Қазақстан Республикасы Парламенті Мәжілісі депутаттарының кезектен тыс сайлауына дайындық пен өткізу мониторингін саяси бейтараптық, ашықтық және сайлау процесіне араласпау қағидаттарына сүйене отырып, жүзеге асыратынына сендірді.
Сондай-ақ ТМД ПАА өкілдері бұқаралық ақпарат құралдарында сайлау науқанын жария ету мониторингі, сайлауды қаржыландыру, электоралдық оқыту және сайлау науқанына қатысушылардың тең құқығын қамтамасыз ету мәселелерімен танысты.
Барлық қойылған сұрақтарға ҚР ОСК мүшелері толық жауап берді.
Нұрлан Әбдіров өз кезегінде делегацияға Қазақстандағы сайлауды халықаралық байқауға тұрақты қатысатыны үшін алғыс айтып, ТМД ПАА байқаушылар тобының толыққанды және тиімді жұмысы үшін барлық қажетті жағдайлар жасалатынын атап өтті.
Бүгінгі таңда 11 мемлекеттен және 3 халықаралық ұйымнан 97 халықаралық байқаушы аккредиттелген.
Қысқа да нұсқа. Жазылыңыз telegram - ға