«Манипуляцияға жол беруге болмайды». Депутат Magnum желісіндегі жағдайға пікір білдірді
Мәжіліс депутаты Елнұр Бейсенбаев Magnum компаниясына қатысты әлеуметтік желілерде тараған жағдайға байланысты пікір білдірді, деп хабарлайды El.kz ақпарат агенттігі.
Депутат қоғамда болып жатқан мәселені жіті зерттегенін айта келе, оны ушықтыруға болмайтынын жеткізді.
Біріншіден, манипуляцияға жол беруге болмайды. Мен бұл мәселені зерттедім, қарадым. Бұл тек Еңбек кодексі аясында реттелетін дүние. Бұл жұмыс беруші мен жұмысшының қарым-қатынасы. Одан бір саяси, қоғамдық резонанс тудырып, қазақ тілі қорланып жатыр деген әңгіме емес. Бұл – жеке бастың дауы. Осы жазып алған бейнекамералар жоқ. Қандай әңгіме айтылғанын біз білмейміз. Сол себептен, менің ойымша, Магнум да, қоғамдағы көп белсенділер де тек манипуляцияға алданып отырған сияқты. Ол біздің ішіміздегі кәсіпкер, қаншама қызмет беріп жатыр. Қаншама қазақ жастары Магнумда жұмыс істеп жүр. Одан қалса, екі қазақ баласының арасындағы конфликт. Менің ойымша, одан бір дау тудырып, қаншама адам жұмыссыз қалады деп, бұлай айту қажет емес дүние деп есептеймін. Сіздер де, бұқаралық ақпарат құралдары, осындай тексерілмеген, нақты ақпараты жоқ, баяғыда айтатын еді ғой "самаурыннан су кетті десе, Самарқандты су алды деген" әңгіменің пұшпағында кетудің қажеті жоқ. Қою керек қой ондай нәрсені. Ол біздер Парламентте немесе сіздер талқылайтын дүние емес, - деді депутат.
Қысқа да нұсқа. Жазылыңыз telegram - ға