Махаббат хикаясы: Димаш Құдайбергеннің жаңа бейнебаяны қалай түсірілді
2025 жылдың 7 наурызында Димаш Құдайбергеннің «Love’s Not Over Yet» атты жаңа әнінің бейнебаяны көрермендерге жол тартты, деп хабарлайды El.kz ақпарат агенттігі.
Бұл туынды музыкалық платформаларда қолжетімді болып, Димаштың YouTube арнасында эмоцияға толы музыка мен бейнероликтің ерекше үйлесімін паш етті. Бейнебаянның сценарийі мен шығармашылық процесі туралы режиссер Ғалым Асылов пен желілік продюсер Жәнібек Гусманов DimashNews редакциясына сұхбат берді.
Сценарий қалай дүниеге келді
Бейнебаянның идеясы Димаштың өзінен шыққан. Режиссер Ғалым Асыловтың айтуынша, Димаш әнді тыңдап отырып, сюжеттің негізін өзі құра бастаған. Команда осы идеяны дамытып, толықтырып, сценарийді аяқтаған. Яғни, ән бейнебаянға шабыт берген.
Түсірілім процесі
Түсірілім Алматы қаласында, «Шоқан Уәлиханов атындағы мектеп», «Тау Самал» коттедж қалашығы және «Эверест» тұрғын үй кешені сияқты локацияларда өтті. Ең қиын бөлігі – ұшақтағы көріністер болды, себебі кеңістік шектеулі болғанымен, шынайылықты сақтау маңызды еді. Жалпы түсірілім 4-5 ауысымда аяқталып, дайындық пен монтаждау процесі 4-5 айға созылды. Жобаға 100-ге жуық адам атсалысты.
Кастинг және актерлер
Негізгі кейіпкерлерді таңдауға Димаштың өзі қатысты. Кастинг барысында көптеген балалар қаралып, басты рөлдерге лайықты актерлер таңдалды. Режиссердің айтуынша, басты кейіпкердің бала кезі Димаштың өз балалығына ұқсайды. Ал мектеп оқушылары қосымша рөлдермен қатар, негізгі кейіпкерлердің образын да сәтті сомдады.
Қызғалдақтың рөлі
Бейнебаяндағы қызғалдақ – қамқорлық пен сүйіспеншіліктің символы. Бұл идея Димаштан шыққан. Гүл оқиғаның басынан аяғына дейін сюжетті байланыстырып, махаббат тарихының маңызды белгісі ретінде көрінеді.
Ерекше формат
Бейнебаян стандартты клип емес, толыққанды фильмнің бір бөліміндей әсер қалдырады. Режиссердің шешімі бойынша, оқиғаның аяқталуы көрерменнің қиялына қалдырылған. Ал сюжеттің екі бөлімнен тұруы Димаштың идеясы бір әнге сыймағандықтан қабылданған шығармашылық шешім болды.
Негізгі идея
Ғалым Асыловтың пікірінше, бейнебаянның басты ойы – шынайы махаббаттың кез келген сынақтан өте алатындығы. «Шынайы махаббат мәңгілік өмір сүреді» деген хабарды туынды көрерменге жеткізеді.
Димаштың шығармашылық көзқарасы мен команданың кәсіби тәсілі үйлескен бұл бейнебаян – оның өнердегі жаңа белесінің жарқын көрінісі.
Қысқа да нұсқа. Жазылыңыз telegram - ға