Концертке мұғалімдерден ақша жинағандар қалай жазаланды
Жамбыл облысында мұғалімдердің концерт билеттерін мәжбүрлі түрде сатып алуына қатысты тексеру аяқталды, деп хабарлайды El.kz ақпарат агенттігі.
Өңірлік білім сапасын қамтамасыз ету департаментінің мәліметінше, концертке билеттерді сатып алуды білім бөлімінің бас маманынан Қордай ауданы әкімі аппаратының бас инспекторы сұраған. Ал ол өз кезегінде билеттерді мектеп директорларына таратқан.
Қазақстан Республикасының Әкімшілік құқық бұзушылық туралы кодексінің 409-бабы 7-3-тармағының 4) тармақшасына сәйкес, Қордай ауданы әкімі аппаратының бас инспекторына, білім бөлімінің бас маманына және бірнеше мектеп директорына ескерту түріндегі тәртіптік шара қолданылды. Сонымен қатар, осындай заңбұзушылықтардың қайталануына жол бермеу мақсатында түсіндіру жұмыстары жүргізілді.
Еске салайық, 17 ақпанда Жамбыл облысы Қордай ауданында билеті өтпей жатқан әншінің концертіне мұғалімдерден мәжбүрлі түрде ақша жиналғаны хабарланған болатын. Бұл жағдайға қатысты оқу-ағарту министрлігінің ресми өкілі Мереке Амангелдіқызы пікір білдірді. Министрліктің білім беру саласындағы сапаны қамтамасыз ету департаменті аталған мәселе бойынша тексеру жүргізетінін мәлімдеген.
Бұл жайт қоғамда резонанс тудырып, мұғалімдердің қосымша қаржылық жүктемеге ұшырау мәселесін тағы да күн тәртібіне шығарды.
Қысқа да нұсқа. Жазылыңыз telegram - ға