“Халықтың сүйіктісі” ұлттық сыйлығының жеңімпаздары анықталды
«Халық сүйіктісі» ұлттық жүлдесі иегерлері белгілі болды. Жыл бойы бұқара назарында болып, көпшілік көңілінен шыққандар бағалы сыйлықтармен марапатталды, деп хабарлайды El.kz ақпарат агенттігі.
Биылғы номинанттар саны - 100 адам. Соның ішінде үздіктер 10 номинация бойынша анықталды. Олардың арасында дәрігер, ұстаз, спортшы мен қоғам белсендісі, мәдениет қайраткері секілді қоғамға еңбегі сіңген жандар бар. Бас-аяғы 300 мың адам өз «сүйіктілеріне» Lubimec.kz сайты арқылы дауыс берген.
Ғалым Байтоқ, жоба авторы әрі ұйымдастырушысы:
Бұл ең ашық премия. Себебі халық өзі таңдау жасайды. Дауыс беру әлеуметтік желілерде өтеді. Және ең маңыздысы - дауыс берушілер үміткерлерді өздері ұсынып, өздері анықтайды. Әділ қазылар тек есімдерін жария етеді.
Ұлттық сыйлыққа биыл жаңадан қосылған номинациялар бар. Соның бірі «Жыл ғалымы» номинациясы. Бұл марапатқа ғалым Мақсат Жабағин ие болды. Ал «Жыл парламентариі» аталымымен – депутат Асхат Аймағамбетов, «Жылдың үздік спортшысы» - дзюдодан Олимпиада чемпионы Елдос Сметов, ал «Жылдың үздік параспортшысы» парадзюдодан Паралимпиада чемпионы Ақмарал Науатбек атанды. Сондай-ақ Димаш Құдайберген ұлттық сыйлықтың биыл төртінші рет лауреаты атанды. Сыйлық алуға әншінің өзі емес әкесі Қанат Айтбаев келді.
Халықтың ықыласынан, ілтипатынан асқан марапат жоқ. Біз үшін бұл үлкен баға. Әрдайым Димашты қолдап отыратын қолдаушыларына алғыс білдіремін, - деді Қанат Айтбаев.
Ал «Жылдың үздік параспортшысы» парадзюдодан Паралимпиада чемпионы Ақмарал Науатбек бұл сыйлықты мүлдем күтпегенін айтады. Ол тіптен дәл осы байқауға ұсынылып, дауыс беру жүріп жатқанынанда бейхабар болдым дейді.
Күтпеген марапат болды. Бұл жүлденің орны мен үшін бөлек. Халықтың сүйіктісі деген ат - бұл өте ең жоғарғы ат, деп есептеймін. Бұл сыйлықты халықтың сыйы деп білемін. Мені таңдап, дауыс берген барша қазақстандықтарға алғыс білдіремін. Көк туымыз көкте желбіресін, - деді Ақмарал.
Ұлттық сыйлықтың иегерлеріне диплом мен «like» іспеттес эксклюзивті қола мүсінше беріледі. Айта кетейік, «Халық сүйіктісі» жүлдесі он үшінші рет өтіп отыр.
Қысқа да нұсқа. Жазылыңыз telegram - ға