Гүлнара Кәрімованың бостандыққа шыққаны рас па
Өзбекстан билігі соңғы күндері әлеуметтік желілер мен бірқатар ақпарат құралдарында тараған «Гүлнара Кәрімова бостандыққа шықты» деген мәліметті ресми түрде жоққа шығарды, деп хабарлайды El.kz ақпарат агенттігі.
UzNews.uz порталы аноним дереккөздерге сүйене отырып бұл ақпаратты жариялағанымен, Өзбекстан Жоғарғы сотының баспасөз қызметі оны жалған деп мәлімдеді. Ресми өкілдер бұл мәліметтің шындыққа жанаспайтынын және ешбір нақты дәлелге негізделмегенін атап өтті.
Еске салайық, бұған дейін Өзбекстанның әділет министрлігі Гүлнара Кәрімоваға қатысты қаржылық активтердің елге қайтарылатыны туралы ақпарат таратқан болатын. Атап айтқанда, 2024 жылғы 6 ақпанда қол қойылған келісім аясында Швейцариядан Өзбекстанға 182 миллион доллар көлеміндегі қаражат аударылатыны белгілі болды. Министрлік мәліметінше, бұл қаражат әлеуметтік маңызы бар жобаларға бағытталмақ.
Гүлнара Кәрімова – Өзбекстанның тұңғыш президенті Ислам Каримовтың үлкен қызы. Оның аты 2013 жылдан бастап халықаралық деңгейде жемқорлық, ақшаны жылыстату, бопсалау және қылмыстық ұйым құру істерімен байланыстырылып келеді. 2015 жылы ол алғаш рет ұрлық пен бопсалау айыптары бойынша сотталып, 5 жылға бас бостандығын шектеу жазасына кесілді. Кейін оған қосымша айыптар тағылып, бірнеше мәрте жазасы күшейтілді.
2017 жылы оған 10 жылға бас бостандығынан айыру жазасы тағайындалып, кейін бұл жаза 5 жылдық үйқамақпен ауыстырылды. Алайда 2019 жылы үйқамақ шарттарын бұзғаны үшін Кәрімова жалпы режимдегі колонияға ауыстырылды. Ал 2020 жылы Ташкент қалалық соты оны қастандық, бопсалау, ысырап ету және ақшаны жылыстату баптары бойынша 13 жыл 4 ай мерзімге соттады.
Соңғы мәліметтерге сәйкес, 2024 жылдың желтоқсан айында Гүлнара Кәрімова Ташкент облысындағы Зангиата ауданындағы әйелдер колониясынан сол ауданның колония-қонысына ауыстырылған. Бұл жайт оның түрмеден босап шыққанын білдірмейді, тек жазаны өтеу шарттарының біршама жеңілдегенін көрсетеді.
Айта кетейік, Швейцария прокуратурасы да Гүлнара Кәрімованы халықаралық қылмыстық ұйымды басқару және заңсыз қаржы операцияларын жүргізу бойынша айыптаған. Бұл істер әлі де халықаралық құқық аясында бақылауда.
Осылайша, ресми деректерге сүйенсек, Гүлнара Кәрімова әлі де бас бостандығынан айыру жазасын өтеуде және оның босатылғаны жөніндегі ақпарат шындыққа сәйкес келмейді.
Қысқа да нұсқа. Жазылыңыз telegram - ға