Есік көлінің бөгеті қайта жаңғыртудан өтеді
Биыл Есік көлінде бөгеттің ауқымды реконструкциясы басталады, деп хабарлайды El.kz ақпарат агенттігі.
Жобаға 23,6 миллиард теңге көлемінде жеке инвестиция тартылып, гидротехникалық құрылымның қауіпсіздігін арттырумен қатар, өңірдің туристік инфрақұрылымын дамытуға бағытталған. Құрылыс жұмыстары барысында 180 жаңа жұмыс орны ашылады.
Реконструкция 2025-2026 жылдарға жоспарланған. Осы кезеңде бөгетті кешенді сараптамадан өткізу, жобалық құжаттаманы әзірлеу және қалпына келтіру жұмыстарын бастау көзделген. Барлық жұмыстар Қазақстан Республикасының заңнамасында бекітілген қауіпсіздік нормаларына сәйкес жүргізіледі.
“Хабель” ЖШС-нің бас директоры жобаның аймақ үшін ғана емес, бүкіл ел үшін маңыздылығын атады.
Есік – біз үшін жай ғана көл емес, өміріміздің мәні. Біздің мақсатымыз – Есік көлін бүкіл Қазақстанның көрнекті орнына айналдыру. Табиғатқа, жан-жануарлар мен өсімдіктер әлеміне, жалпы биосфераға ұқыпты және саналы көзқарас – біздің негізгі ұстанымымыз, - деді ол.
Реконструкцияның алғашқы кезеңі бес жылға жоспарланған және келесі жұмыстарды қамтымақ. Оның ішінде бөгетті нығайту және оның сенімділігін арттыру, туристік инфрақұрылымды дамыту – жылжымалы тамақтану орындарын орналастыру, байланыс мұнараларын орнату, модульдік үйлер салу жобасы бар.
Барлық жұмыстар мемлекеттік органдардың қатаң бақылауымен жүзеге асырылады. Құрылыс және пайдалану стандарттарының сақталуын уәкілетті органдар қадағалайды. Сонымен қатар, жеке инвестор тартатын мердігерлік ұйымдар құрылыс және бөгеттерді пайдалану саласындағы заңнамалық талаптарға сәйкес болуы тиіс.
Есік көліндегі бөгетті реконструкциялау – гидротехникалық құрылыстың қауіпсіздігін қамтамасыз етумен қатар, туристік саланы дамыту үшін де маңызды қадам. Жоба нысанның сенімділігін арттырып қана қоймай, өңірге туристерді тартудың жаңа мүмкіндіктерін ашады. Жаңартылған инфрақұрылым аймақтың тартымдылығын арттырып, оның экономикалық өсіміне серпін береді.
Қысқа да нұсқа. Жазылыңыз telegram - ға