Елорда оқушыларына соғыс қаһармандарының тарихы мен ерліктері туралы айтылды
Елордадағы №5 балалар кітапханасында қала мектептерінің оқушылары үшін «Өшпес ерлік шежіресі» тақырыбында дәріс өтті, деп хабарлайды El.kz ақпарат агенттігі.
Астана әкімдігінің мәліметінше, іс-шара студенттер арасында отансүйгіштікке тәрбиелеуге, өткен тарихқа құрметпен қарауды дамытуға, ІІ дүниежүзілік соғыс тарихына қызығушылықты дамытуға, соғыс және еңбек ардагерлерінің ерліктерін есте сақтауға бағытталған.
№32 мектеп-гимназиясы мен №64 орта мектеп оқушыларына соғыстың негізгі оқиғалары, қазақстандықтардың майдандағы және тылдағы ерліктері туралы айтылды.
Кітапхана қызметкерлері арнайы тақырыпқа арналған кітап көрмесін дайындап, соғыс туралы шығармаларды ұсынды. Бұл кітаптар жеткіншектердің сол жылдардың қасіретін, қиындығын тереңірек түсініп, өткен тарихты сақтаудың маңыздылығын сезінуге көмектесті.
ІІ дүниежүзілік соғыс туралы кітаптарымыз жастарға Отан үшін жанын қиған жандардың ерліктерін тереңінен сезінуге көмектеседі. Осы іс-шара аясында ІІ дүниежүзілік соғысына қатысқан Бауыржан Момышұлы, Жұбан Молдағалиев, Рақымжан Қошқарбаев сынды авторлардың шығармалары қойылған кітап көрмесі ұйымдастырылды. Бұл – жастарға әдебиетті насихаттауға бағытталған қадам, - деді Гүлшат Сәттібаева.
Қазақстандық авторлардың кітаптары мен жасөспірімдерге және балаларға арналған әдебиетке ерекше көңіл бөлінді. Бұл кітаптар соғысты тарихи деректер арқылы ғана емес, батырлардың жеке басынан өткен оқиғалар арқылы да елестетіп, сезінуге мүмкіндік береді. Сондай-ақ, мектеп оқушылары үшін «Сұрақ-жауап» интерактивті оқу блогы өткізілді, онда мектеп оқушылары сол жылдардағы оқиғалар туралы білімдерін көрсетті.
Соғыс туралы көп естідім, бірақ бүгінгі сабақтан кейін тәуелсіздігіміз үшін күрескен жандарды еске алудың қаншалықты маңызды екенін түсіндім. Олардың арқасында біз бейбіт өмір сүріп жатырмыз, оны ешқашан ұмытуға болмайды, - деп студенттердің бірі өз әсерімен бөлісті.
Балалар кітапханасында өткен іс-шара жас ұрпақты тәрбиелеудегі маңызды қадам болды. Бұл балалардың ата-баба ерлігіне мақтаныш сезімін оятуға, тарихи оқиғаларды насихаттауға ықпал етті.
Мұндай іс-шаралар оқушылардың ІІ дүниежүзілік соғысының маңызын тереңірек түсініп қана қоймай, олардың бойында ата-бабаларымыздың ерлігіне мақтаныш сезімін оятуға септігін тигізеді. Бүгінгі ҰОС қаһармандарына арналған кітап көрмесі балалардың ерекше назарын аударды, бұл іс-шара олардың жүректерінде терең із қалдыратынына сенімдімін, - деді қазақ тілі мен әдебиеті пәнінің мұғалімі Сауле Жетпісова.
Қысқа да нұсқа. Жазылыңыз telegram - ға