Еліміздің әйелдер құрамасы Қырғызстанда турнирден қос жолда алуды көздеп отыр
Әйелдер күресінен ұлттық құрама Бішкекте өтетін лицензиялық сыннан 2 жолдама алуды көздеп отыр, деп хабарлайды El.kz ақпарат агенттігі Olympic.kz-ке сілтеме жасап.
19-21 сәуір күндері Қырғызстан астанасында күрес түрлерінен Азия аймақтық лицензиялық турнирі өтеді. Аталған сынға қатысатын Қазақстан әйелдер құрамасының бас бапкері Қайрат Сағадиев лицензияға қатысты пікірін бөлісті.
Бішкекке 11 сәуірде ұшамыз. Қазір Азия чемпионаты мен лицензиялық турнирге дайындалудамыз. Құрлық додасында олимпиадалық емес салмақтардағы ел чемпиондары мен қалған салмақтағы күміс жүлдегерлер күреседі. Олимпиадаға іріктеу турниріне қатысатын спортшылар бір апта бұрын барып, климатқа бейімделіп, жеке бапкерлерімен тактикалық тұрғыда жұмыс істей бермек. 20 сәуір күні қыздарымыз лицензия үшін кілемге шығады. Алты салмақтың екеуінде Олимпиадаға жолдама алсақ деген мақсатымыз бар, - дейді бас бапкер.
Еске сала кетейік, әйелдер күресінен Қазақстан командасында Париж Олимпиадасының жолдамасы жоқ. Бішкек төрінде алты балуанымыз лицензияға таласады.
Олар:
50 келі: Лаура Ғаниқызы
53 келі: Жұлдыз Ешімова
57 келі: Эмма Тисина
62 келі: Ирина Кузнецова
68 келі: Елена Шалыгина
76 келі: Жәмила Бақбергенова.
Қысқа да нұсқа. Жазылыңыз telegram - ға