Елімізде тәулік бойы жұмыс істейтін заманауи кітапханалар бой көтереді

Қасым-Жомарт Тоқаев Атыраудағы Ұлттық құрылтайда сөйлеген сөзінде ақпараттық технологияны жөн-жосықсыз пайдалану бала тәрбиесіне кері әсер етіп жатқанын айтты, деп хабарлайды El.kz ақпарат агенттігі.

Тек ақпараттық технологияның пайдалы жағын алып, зиянды жағынан сақ болған жөн. Ашығын айтсақ, интернетті талғамсыз пайдалану бала тәрбиесіне теріс ықпал етіп жатыр. Бұл – өкінішке қарай, ақиқат. Балалар түгілі, ата-аналар да әлеуметтік желідегі мағынасыз контентке тым әуес, - деді ол.

Президент осы орайда жастарды кітап оқуға баулуға шақырды. Кезінде миллиондаған кітап қорынан айырылсақ, бүгінде сол олқылықтың орнын толтыру үшін жұмыс атқарылып жатыр.

Біз, ең алдымен, жастарды кітап оқуға баулуымыз керек. Сонда жаппай кітап оқитын ұлтқа айналамыз. Тәуелсіздік кезеңінде елімізде кітапхана ісі кенжелеп қалды. Тоқсаныншы жылдардағы аласапыран уақытта мыңдаған кітапхана жабылды. Миллиондаған кітап қорынан айырылдық. Соңғы жылдары жағдайды түзеу үшін әрекет жасалып жатыр. Кітапхана – мемлекеттің, ұлттың негізгі жады. Еліміз үшін құнды тарихи деректер мен материалдардың дені кітапханада сақталады. Сондықтан кітапхана ісін дамытуға бейжай қарауға болмайды, - деді президент.

Тоқаев кітаптың оқырманға қолжетімді болуын алға тарта келе, бүгінде Алматыда және Астанада тәулік бойы жұмыс істейтін заманауи кітапханалар салынатынын тілге тиек етті.

Қысқа да нұсқа. Жазылыңыз telegram - ға