Доллар бағасы азық-түлік нарығына әсер етпейді – вице-министр
ҚР Ұлттық банкінің ресми мәліметі бойынша күні кеше ақша айырбастау пунктерінде доллар бағамы 540 теңгеге жетті. Ал бүгін АҚШ долларының бағамы 524 теңгеге дейін түсті. Валюта бағамындағы мұндай өзгеріс Қазақстанның агроазық-түлік нарығына қалай әсер етуі мүмкін? Бұл туралы Ауыл шаруашылығы вице-министрі Азат Сұлтанов айтып берді, деп хабарлайды El.kz ақпарат агенттігі.
Азат Сиражиддинұлының сөзінше, еліміз жоғары дәрежеде өзін-өзі негізгі азық-түлікпен қамтамасыз етіп отыр. Соның арқасында валюта бағамының ауытқуы Қазақстанның агроазық-түлік нарығына айтарлықтай әсер етпейді.
Қазақстан ішкі сұранысты қанағаттандыру және импортқа тәуелділікті барынша азайту үшін астық, ет, сүт және басқа да стратегиялық маңызды өнімдерді жеткілікті мөлшерде өндіреді. Биылғы жылдың рекордтық өнімі біздің азық-түлік қауіпсіздігімізді нығайтып қана қоймай, экспортты кеңейту үшін жаңа мүмкіндіктер туғызды. Агроөнеркәсіптік кешеннің тұрақтылығы, мемлекеттің қолдауы және ауыл шаруашылығы өндірушілерінің жоғары тиімділігі Қазақстанға ішкі нарықта тұрақты бағаны сақтауға және өз азаматтары үшін де, халықаралық әріптестер үшін де азық-түлік қауіпсіздігінің сенімді кепілі болып қалуға мүмкіндік береді, – деп атап өтті вице-министр.
Азат Сұлтановтың айтуынша, азық-түлік тауарларының 29 негізгі түрі бойынша 10 тауар позициясы негізінде ішкі нарық 100% және одан да көп (бидай ұны, тұз, нан, күріш, макарон, күнбағыс майы, картоп, қой еті, сиыр еті, сәбіз) қамтамасыз етілген, 14 азық-түлік тауарлары бойынша 80% және одан да көп (тауық жұмыртқасы, қияр, жылқы еті, қызанақ, сүт, қарақұмық жармасы, қырыққабат, бұрыш, шошқа еті, пияз, қызылша, ашытылған сүт өнімдері, май, алма) сондай-ақ тек 5 азық-түлік тауарлары бойынша нарықтың қажеттілігі ішінара импорттық жеткізілім есебінен қамтамасыз етіледі. Көрсетілген тауар позициялары негізінде Үкімет өндіріс көлемін ұлғайту және импортты алмастыру бойынша жүйелі жұмыс жүргізуде.
Қараша айының соңындағы өңірлердің жедел деректері негізінде республика бойынша шамамен 1,7 млн. тоннадан астам азық-түлік тауарларының қорлары бар. Оның ішінде: ӘКК қорлары 275,2 мың тонна, сауда объектілерінде (айналым схемасын есепке алмағанда) – 228,1 мың тонна, өндіруші кәсіпорындарда (АШТӨ, көкөніс қоймалары, зауыттар) – 1,1 млн. тонна, қоймаларда (кто, КЛО және т.б. қойма) – 102,2 мың тонна. Айта кету керек, бұл белгілі бір күнге арналған қорлар. Азық-түлік өндірісі тоқтамайды, қорлар күнделікті негізде толықтырылады, – деді ол.
Ауыл шаруашылығы вице-министрі бұл ретте жарма, ұн және басқа да тауарларды өндіру үшін шикізаттың жеткілікті көлемі, сондай-ақ ет және сүт өнімдерін өндіру үшін ауыл шаруашылығы жануарларының жеткілікті саны бар екенін де айта кетті.
Көкөніс дақылдарының жоғары өнімділігі халықтың көкөністерге, оның ішінде маусымаралық кезеңде толық қажеттілігін қамтамасыз етуге мүмкіндік береді. Осылайша, аграрлық сектор сыртқы ауытқулар жағдайында да тұрақтылықты көрсете отырып, экономиканың стратегиялық зәкірі болып қала береді. Мемлекеттік қолдаудың арқасында Қазақстан өңірдің астық қоймасы және азық-түлік тұрақтылығының кепілі мәртебесін сенімді түрде бекітуді жалғастыруда, – деп сөзін қорытындылады Азат Сиражиддинұлы.
Қысқа да нұсқа. Жазылыңыз telegram - ға