Дәнекерлеуші Виктория: Өзіңе ұнайтын жұмыстың қиындығы білінбейді
Жамбыл индустриалды-технологиялық колледжінің 3-курс студенті Виктория Маркова – «Дәнекерлеу ісі» мамандығында оқитын жалғыз қыз.
Қазіргі таңда техникалық мамандықтарға деген сұраныс артып келеді. Дегенмен, бұл салаларда көбінесе ер адамдар еңбек ететіні жасырын емес. Бірақ бұл стереотипті бұзып, өз жолын таңдаған жандар да бар. Сондай қайсар қыздың бірі – Жамбыл индустриалды-технологиялық колледжінің 3-курс студенті Виктория Маркова. Ол «Дәнекерлеу ісі» мамандығын меңгеріп, ер азаматтармен иық тіресе білім алуда. Біз Викториямен сұхбаттасып, оның бұл мамандықты таңдаудағы себептері, оқудағы жетістіктері мен болашаққа құрған жоспарлары жайлы әңгімелестік.
El.kz: Виктория, алдымен өзіңіз жайлы айтып өтсеңіз. Сізді дәнекерлеуші болуға не итермеледі?
Виктория Маркова: Мен 18 жастамын, қазір Жамбыл индустриалды-технологиялық колледжінде «Дәнекерлеу ісі» мамандығы бойынша білім алып жатырмын. Мектепте оқып жүргенде-ақ техникалық мамандықтарға қызығатынмын. Ал дәнекерлеу ісі маған ерекше болып көрінді – бұл тек мықтылық пен дәлдікті ғана емес, шығармашылық қабілетті де талап ететін мамандық. Мектепті бітірген соң, өзіме жақын кәсіпті таңдауға бел будым. Бүгінде өз ісімді сүйіспеншілікпен меңгеріп келемін.
El.kz: Көп адам дәнекерлеу ісін ер адамдарға арналған мамандық деп санайды. Сіз қалай ойлайсыз?
Виктория Маркова: Жоқ, мен ешқашан бұл мамандық тек ерлерге ғана арналған деп ойлаған емеспін. Әр адам өз жүрек қалауымен мамандық таңдауы керек деп есептеймін. Әрине, бұл кәсіптің өзіндік қиындықтары бар – ауыр құрал-жабдықтармен жұмыс істеу, қауіпсіздік техникасын қатаң сақтау қажет. Бірақ мен бұл қиындықтарға дайынмын. Ең бастысы – өз ісіңді жақсы көру.
El.kz: Сіз топтағы жалғыз қызсыз. Бұл оқу процесіне әсер ете ме?
Виктория Маркова: Иә, мен топтағы жалғыз қызбын. Бірақ бұл мен үшін ешқандай қиындық туғызбайды. Керісінше, менімен бірге оқитын достарым үнемі қолдап, көмектесіп жүреді. Олар мені өздерімен тең дәрежелі әріптесі ретінде қабылдайды. Сонымен қатар, оқытушыларым да әрдайым бағыт-бағдар беріп, білгендерін үйретуде.
El.kz: Осы мамандықты меңгеру барысында қандай қиындықтарға тап болдыңыз?
Виктория Маркова: Көпшілік «бұл – әйел адамға арналмаған мамандық» деп айтып жатады. Бірақ менің қолымнан келмейді деп сенбегендерге қарамастан, мен өзімді дәлелдей алдым. Ең бастысы – отбасым, достарым және ұстаздарымның қолдауы. Әсіресе, менің ағам Егор Марков дәнекерлеуші болып жұмыс істейді және осы колледжде оқыған. Сондай-ақ, менің кәсіби қалыптасуыма жетекшім Серік Ташкенов үлкен үлес қосуда.
El.kz: Оқу барысында қандай қиындықтарға тап болдыңыз?
Виктория Маркова: Ең басты қиындық – айналадағы адамдардың күмәнмен қарауы болды. Кейбіреулер: «Бұл қыздарға арналмаған кәсіп, сен шыдай алмайсың» – деп айтатын. Бірақ менің отбасым, достарым және ұстаздарым мені әрдайым қолдап келеді. Әсіресе, ағам Егор Марков – өзі де дәнекерлеуші, осы колледжді бітірген. Оның қолдауы мен үшін үлкен мотивация болды. Сонымен қатар, менің кәсіби қалыптасуымда жетекшім Серік мырза Ташкеновтың да орны бөлек. Ол маған дәнекерлеу ісінің барлық қыр-сырын үйретуде.
El.kz: Қыз бала үшін бұл салада қандай артықшылықтар мен қиындықтар бар?
Виктория Маркова: Әр мамандықтың өзіндік ерекшеліктері бар. Бұл саланың басты артықшылығы – жоғары сұранысқа ие, тұрақты табыс әкелетін кәсіп. Сондай-ақ, дәнекерлеу – шығармашылық элементтері бар жұмыс. Яғни, сен металды тек қосып қана қоймай, оны әдемі әрі сапалы етіп өңдеуге де жауаптысың. Ал қиындықтарына келсек, кейде ауыр құрал-жабдықтарды көтеруге тура келеді, бірақ бұл кезде маған достарым көмектесіп жатады.
El.kz: Болашақта сіз сияқтық дәнекерлеуші боламын дейтін қыздарға қандай кеңес берер едіңіз?
Виктория Маркова: Ең бастысы – өзіңізге сеніңіз! Егер бұл кәсіп сізге ұнаса, ешкімнің пікіріне мән бермеңіз. Қоғамдағы стереотиптерге қарамастан, кез келген мамандықты меңгеруге болады. Еңбекқорлық пен табандылық бәрін жеңеді.
El.kz: Болашаққа мақсаттарыңыз қандай?
Виктория Маркова: Болашақта осы салада үлкен жетістіктерге жеткім келеді. Мақсатым – жоғары деңгейлі кәсіби дәнекерлеуші атанып, өз ісімді ашу. Өзімнің жеке зауытымды құру – ең үлкен арманым!
Виктория Маркова – еңбекқорлығы мен батылдығының арқасында өз саласында биік белестерді бағындыруға ұмтылып жүрген жан. Оның қайсарлығы көпшілікке, әсіресе, өз болашағын техникалық саламен байланыстырғысы келетін қыздарға үлкен мотивация болары сөзсіз.
Қысқа да нұсқа. Жазылыңыз telegram - ға