Отанды сүю – ең ұлы сезім

          «Өз Отанын жан-тәнімен сүю – адамшылықтың асқар шыңы»

 В. Г. Белинский

«Қазақстан – дүниедегі әр қа­зақтың қастерлі құбыласы! Қа­зақстан – әлемдегі барша қа­зақ­тың құтты қарашаңырағы! Қазақ ба­ласы дүниенің қай түкпірінде жүр­се де, тұтас қазақ халқының бір бөлшегі екенін біз еш уа­қыт­та ұмытпауымыз керек», – деп Елбасымыз айтқандай, қазақ жері – киелі жер. Барша қазақтың өнуі де, өсуі де өз елімізде, өз жерімізде болмақ.

Отанды сүю дегеніміз – ең ибалы сезім. Отанды құрметтеу, ең алдымен, өзіңді құрметтеуден бастау алады. Өзіңді құрметтеу жақыныңды, өз үйіңді сыйлау екені шындық. Міне, осыдан болар, Отан отбасынан басталатындығы. Патриотизм – адам бойындағы ең қасиетті сезім. Патриотизм - туған еліңді сүюмен қатар, оған қалтқысыз еңбек ету, сол елдің бір бөлшегі екеніңді сезіну.

Елбасы өз жолдауында: «Біздің балаларымыз бен немерелеріміз сырт елден гөрі Отанында өмір сүргенді артық көретіндей,өз жерінде өзін жақсы сезінетіндей болуға тиіс. Біздің еліміздің әрбір азаматы өзін өз жерінің қожасы ретінде сезінуге тиіс. Егер мемлекет әр азаматтың өмір сапасына, қауіпсіздігіне, тең мүмкіндіктеріне және болашағына кепілдік беретін болса, біз елімізді сүйеміз, онымен мақтанамыз. Өз бойымызда және балаларымыздың бойында жаңа қазақстандық патриотизмді тәрбиелеуіміз керек. Бұл ең алдымен елге және оның игіліктеріне деген мақтаныш сезімін ұялатады» деген болатын. Әрбір адамның туып-өскен жеріне құрметпен қарауы, ана тілін меңгеріп, сол тілде өз ойын толық жеткізе алуы – барлығы патриотизмнің негізі болмақ. Отанды сүюді қалай түсінуге болатынын М. Шаханов былай жырға қосқан болатын.

«Тағдырыңды тамырсыздық індетінен қалқала,

Әр адамда өз анасынан басқа да

Болу керек құдіретті төрт ана:

Туған жері – түп қазығы, айбыны,

Туған тілі – сатылмайтын байлығы,

Туған дәстүр, салт-санасы тірегі,

Қадамына шуақ шашар үнемі

Және туған тарихы, еске алуға қаншама

Ауыр әрі қасіретті болса да.

Құдірет жоқ төрт анаға тең келер

Онсыз санаң қаңбаққа ұқсап сенделер.

«Төрт ана» болған Отанымыздың қадіріне жету – ұрпаққа сын. Әр адамның адамдығының кепілі – құдіретті төрт ананы көзіміздің қарашығындай сақтап қорғау. Рас, Отанды сүю, ең алдымен, тілімізді құрметтеп, ділімізді сыйлаудан басталмақ. Имансыздың жүрегінде ғана Отанға деген сүйіспеншілігі болмайды. Оны бізден өзге кім сыйлап, кім қадіріне жетсін? Заманымыздың заңғар жазушысы Ғ. Мүсірепов «Ана тілін тек өгей ұлдары менсінбейді, өгей ұлдары ғана аяққа басады деген болатын. Отанға деген махаббатты туған тарих қастерлеуден тануға да болады. Кешегіміздің куәсі болған тарихымызды ертеңге аманат ету де бізге жүктелген үлкен міндет. Қазақ халқын, қазақ жерін «қазақтікі» деп танытуда қымбат құндылығымыз – салт-дәстүріміз алдыңғы қатардан көрінбек. Тарих беттерінен көріп отырғанымыздай, талай қиын-қыстау кезеңдерді бастан өткердік. Соған қарамастан өміріміздің тынысына айналған салт-дәстүріміз өз қасиетін жоғалтпады. Отан деген не? Ол халықтың өткені, бүгіні және келешегі. Өткенімізді бағамдап, бүгінімізді жаңғырта алсақ, келешектен жарқын болашақ қана көре аламыз. Өз елің­нің саяси, экономикалық, әлеу­меттік, мәдени саладағы жетістіктерін мақтан ету, өз Отаныңның бостандығы мен тәуелсіздігін қорғау, ата-бабаларың мен Отаныңның та­ри­хына құрметпен қарау, сон­дай-ақ, өзіңнің табанақы, маңдай теріңді туған еліңнің гүл­денуіне арнау – бұлардың бар­лығы да қазақстандық патрио­тизм деген ұғымның ішіне сыя­ды.

            «Алдағы уа­қытта елді басқаратын жастар са­уатты ғана емес, сондай-ақ на­ғыз патриоттар болуы керек – деді Елбасы. Қа­зіргі кезде ақпараттың ағыны қарқынды дамуда. Біреулер түрлі ақпараттар желісіне қызығып, шет­ел­дерге кетіп жатады. Олардың бар­лығы патриоттар емес. Нағыз пат­риоттар өз елінің мүддесіне қыз­мет ететін, еліне табыс әкелетін адамдар.

Отанымызды сүю – адамдығымызды сақтап, ар алдында адал қызмет атқару. Қандай жұмыс істемейік, жадымызда «Отанымыздың мықты болуына, тұғырының берік болуына атқарар қызметім адал болсын!» дейтін ұран жаңғырып тұру қажет.

Мемлекетіміз жаңадан гүлденіп, бой көтеріп келе жатқан шақта, тамырының терең, тұғырының берік болуына әр азаматының Отанға деген махаббатының шынайылығы үлкен рөл атқарады.

Жамбылбаева Айжан

Қысқа да нұсқа. Жазылыңыз telegram - ға