Білім беру ұйымдарының қауіпсіздігі ІІМ-нің бақылауында
![Білім беру ұйымдарының қауіпсіздігі ІІМ-нің бақылауында Білім беру ұйымдарының қауіпсіздігі ІІМ-нің бақылауында](/storage/storage/element/2023/03/07/mainphoto/40579/1200xauto_uojoGZBze6UcnIuefQRczrgNkt2Kol8jW7hNluhF.jpg)
Бұл туралы Үкімет отырысында Ішкі істер министрі Марат Ахметжанов мәлімдеді, деп хабарлайды El.kz ақпараттық агенттігі.
«Білім беру ұйымдардағы балалардың қауіпсіздігі барлық органдардың басты міндеті. Сол себепті бұл мәселе – Ішкі істер министрлігінің ерекше бақылауында. Бұрын терроризмге осал объектілер қатарына 200 адамнан тұратын оқу орындары кіретін. 2021 жылы бұл өлшем – 100 оқушыға дейін өзгертілді. Нәтижесінде, мұндай білім беру объектілері 6,5 мыңнан 10 мыңға дейін өсті», – деді Марат Ахметжанов.
Сонымен қатар министр Терроризмге қарсы қорғау жөніндегі нұсқаулық бекітілгенін атап өтті.
«Енді адам саны 300-ге дейінгі мекемелерде бейнебақылау мен жариялау жүйелері болу керек. Ал, 700 адамға дейінгі объектілер бейнекамераларды Жедел басқару орталықтарына қосып, дабыл түймелерін орнатуы тиіс. Адам саны 700-ден асса, бұл ұйымдарда және облыстық орталықтағы мектептерде турникеттер және лицензиясы бар күзетпен жасақталған келісімшарт болуы қажет. Бүгінгі таңда аталған талаптарға сәйкес, әкімдіктер білім беру ұйымдарының тізімін жаңартып жатыр», – деді министр.
![Telegram](https://el.kz./static/site/images/tel26.png)