Берік Уәли Абай облысының тұрғындарына үндеу жасады
Абай облысының әкімі Берік Уәли өңір халқына үндеу жасады, деп хабарлайды El.kz ақпарат агенттігі.
Әкім өз сөзінде Абай облысы ұлы тұлғаның атымен аталғанын, алаш арыстарының ізі қалған тарихы терең, табиғаты көркем өңір екенін еске салды.
Біздің аймақ тоғыз жолдың торабында тұр. Ертістің екі жағасын жалғаған жалғыз көпірден екі алып көршімізге қарай көлік ағыны өтеді. Бұл тұрғыдан алғанда Семейіміз аймақтық көлік-логистикалық хабқа айналып келеді. Бұл бізге үлкен мүмкіндік бергенімен, зор жауапкершілік те жүктейді. Шаһарымыздың тазалығы мен аймағымыздың абыройы сыналатын да осы тұс, - деді ол.
Ол өңірдің дамуы әр азаматқа байланысты екенін алға тартты.
Туған жеріміздің түлегені, тұрған ортамыздың кіршіксіз болғаны, ең алдымен, өзімізге керек. Облысымыздың тазалығы – әкімдік пен коммуналдық қызметтің ғана емес, әрбір азаматтың, әрбір отбасының жауапкершілігі. Бір-бірімізге жанашырлықпен, қоршаған ортаға қамқорлықпен қарамасақ, күнделікті жүретін көшелерімізді, балаларымыз ойнайтын аулаларымызды сырттан келіп ешкім тазалап бермейді.
Осы мақсатта Президентіміздің бастамасымен қолға алынған «Таза Қазақстан» бағдарламасы аясында біз облысымызда жалпыөңірлік сенбілікті бастағалы тұрмыз. Бірақ бұл бір реттік акция емес, жыл бойы жалғасатын жақсы дәстүрге айналуы тиіс, - деді Уәли.
Ол бастама баянды болуы үшін «үздік аудан», «үздік ауыл», «үздік аула», «үздік университет», «үздік колледж», «үздік мектеп», «үздік балабақша», «үздік көше», «үздік мекемені» анықтайтын арнайы байқау жарияланғанын да айта кетті.
Ол бұл іске кәсіп иелері де атсалысуы керектігін тілге тиек етті:
Мен осы ретте бизнес өкілдерін, іргелі оқу орындарын, патриот жастар мен еріктілерді, бірлігі жарасқан кәсіпорындар мен ұйымдарды осы игі іске белсенді атсалысуға шақырамын.
Сонымен қатар Абайдың мерейтойы да лайықты атап өтілетінін алға тартты.
Биыл аймағымыз атын иеленген ұлы Абайдың 180 жылдығы! Президентіміз айтқандай, бұл мерейтойды лайықты деңгейде атап өтуіміз керек. Біз бір қолдың саласындай, бір үйдің баласындай бірігіп, бұл шараны жақсы атқаруға тиіспіз. Бірлік танытатын тұстың бірі – осы сәт, ағайын. Себебі біз еліміздің түкпір-түкпірінен келетін қонақтарға көркем де, таза қаламызды ұялмай көрсете алуымыз керек, - деді ол.
Әкім облыс орталығы ретінде екінші тынысы енді ашыла бастаған қала Астана, Алматы, Шымкент сияқты ірі қалалардан үлгі алуға шақырды.
Қоғамдық орынның тазалығы — әр адамның мәдениеті мен ұлтқа деген құрметінің айнасы. Тазалықты сақтау — тек тәртіп емес, бұл — ішкі құндылығымыз. Дінімізде «Тазалық — иманның жартысы» делінсе, дана халқымыз «Тазалық – саулық негізі, саулық – байлық негізі» деп бекер айтпаған. Бұл — халқымыздың өмірлік философиясы мен бүгінгі талапқа сай ұстанымының үндесуі, - деп қосты өңір басшысы.
Оның сөзінше, биылдың өзінде облыста 400 шақырым жол жөнделіп, «Ауыл – Ел бесігі» бағдарламасы аясында 223 шақырым жол қайта жаңғыртылады. 77 мың түп ағаш егіледі.
Сондай-ақ биыл Семей қаласында 22 ауланы абаттандыру жоспарланып отыр. Оның 11-і сол жағалауда, 11-і оң жағалауда. 8 қоғамдық орын жаңартылады.
Биыл облыс орталығында 210 автобус аялдамасы орнатылады. 60 жаңа автобус аламыз. Қала жолдарын тазалау үшін мердігер компаниялар қазірдің өзінде түрлі типтегі 10 арнайы техника сатып алды. Алдағы уақытта да көше тазалайтын техникаларды алатын боламыз, - деп қосты әкім.
Сонымен қатар биыл Семейдегі 10, аудандардағы 100-ге жуық көшені жарықтандырылмақ. Сондай-ақ Семейдегі жылу жүйелерін жаңғырту мақсатында 6 жоба іске аспақ.
Қысқа да нұсқа. Жазылыңыз telegram - ға