Астанадағы мерекелік іс-шараларға 10 000-ға жуық адам қатысты
Астанада Жаңа жыл қарсаңында ұйымдастырылған мерекелік бағдарламаларға елорданың әртүрлі аудандарында 10 000-ға жуық тұрғын мен қонақ қатысты, деп хабарлайды El.kz ақпарат агенттігі қалалық әкімдіктің ресми сайтына сілтеме жасап.
Мереке құрметіне концерттер, спорттық эстафеталар, көңілді ойындар, сыйлықтар және басқа да көптеген шаралар өткізілді.
Сарыарқа ауданында қалалық алаңда (әкімдік ғимаратының алдында) шығармашылық ұжымдардың қатысуымен жаңа жылдық бағдарлама ұсынылып, шайбалы хоккей бойынша кәсіби спортшылардың шеберлік сабағы өтті.
Алматы ауданында Тәуелсіздік даңғылындағы Оқушылар сарайының аумағында балалар шығармашылық ұжымдары ұйымдастырған мерекелік концерт өтті.
Нұра ауданында "Астана Арена" стадионының маңында мерекелік шаралар спорттық ойындармен басталды. Қатысушылар үшін коньки тебу бойынша шеберлік сабақтары, эстафеталар мен концерттік бағдарламалар ұйымдастырылды.
Сарайшық ауданында "Қазақ Елі" монументі жанындағы алаңда көңілді ойындар мен жүлделер берілген сайыстар өтті. Сондай-ақ, эстрада жұлдыздары мен шығармашылық ұжымдардың концерті ұсынылды.
Есіл ауданында ЭКСПО аумағында өткен бағдарламада шайбалы хоккейден шеберлік сабағы, спорттық эстафеталар және концерттік шаралар болды. Бағдарлама екі сағатқа созылды.
Сонымен қатар, қала бойынша слайдтар, тюбингтер, конькилерді жалға беру орындары, мұз айдындары және фотоаймақтар жұмыс істей бастады.
Барлық іс-шаралар жылы атмосферада өтіп, жаңа жылдық көңіл-күй сыйлады.
Қысқа да нұсқа. Жазылыңыз telegram - ға