Астанада газ баллон жарылып, үш адам жарақат алды
Астанада «Нұрлы жол» вокзалы маңындағы коттеджде пропан газ баллоны жарылып, үш адам жарақат алды, деп хабарлайды El.kz ақпарат агенттігі.
Бұл туралы «ҚазТрансГаз Аймақ» АҚ мәлім етті.
5 тамыз күні сағат 16:25-те «ҚазТрансГаз Аймақ» АҚ апаттық диспетчерлік қызметіне үш адамның газ жарылысынан зардап шеккені туралы хабарлама келді. Оқиға Астана қаласының «Нұрлы жол» вокзалының маңындағы шағынауданда болған. Жедел жеткен апаттық-диспетчерлік бригаданың мәліметінше, жеке тұрғын үйде болған газ жарылысына пропан газ баллоны себепкер болған, - деп жазылған ҚазТрансГаз Аймақ хабарламасында.
Жарылыстан зардап шеккен 1995 жылғы ер адам мен оның 7 және 2 жасар балалары қала ауруханасына жатқызылды.
Ұйымның хабарлауынша, газ баллоны редукторының шлангпен жалғанатын жерінде ақау болған. Сол жарықшақтан шыққан газ пропан баллоны тұрған орын мен оған жапсарлас жуынатын бөлмеде жиналып қалған. Кейін жуынатын бөлмеге кіріп жарық жаққандағы ұшқыннан газ жарылысы орын алған.
Үйдің өзі табиғи газға қосылғанымен, жарылыс кезінде табиғи газ өшіріліп тұрған. Үй иелері табиғи газды тек жылыту маусымында ғана қолданған. Қалған кезде газ баллондарын қолданып келген.
Оқиға болған коттедж үй кішігірім той-томалақ өткізу үшін жалға беріліп келген. Бұл үйде газ дабылқаққыштары орнатылған, бірақ ол іске қосылмаған.
Қысқа да нұсқа. Жазылыңыз telegram - ға