Асайын Байханов жұмыс сапарымен Ақсу қаласына барды

Асайын Байханов қаланың тіршілікті қамтамасыз ету кәсіпорындары мен объектілеріне барып, Ақсу мен оның ауылдық аймағын әлеуметтік-экономикалық дамыту мәселелері бойынша кеңес өткізді, деп хабарлайды El.kz ақпарат агенттігі Павлодар облысы әкімінің баспасөз қызметіне сілтеме жасап. 

Өңір басшысы Ақсу қаласындағы сапарын қала құраушы кәсіпорындарға - «Еуроазиялық энергетикалық корпорация» АҚ Ақсу электр станциясына және «Қазхром «ТҰК» АҚ Ақсу ферроқорытпа зауытына барудан бастады. Асайын Байханов кәсіпорындардың жұмысымен, алдағы жұмыс жоспарларымен және олардың даму перспективаларымен танысты.  

«Еуроазиялық энергетикалық корпорация" АҚ - 1996 жылы құрылған  Қазақстандағы электр энергиясы мен көмірді ірі жеткізушілердің бірі. ЕЭК құрамында екі құрылымдық бөлімше: «Восточный» көмір бөлімі мен Ақсу электр станциясы бар. Кәсіпорында төрт жарым мыңға жуық адам жұмыс істейді.

Елімізде өндірілетін барлық электр энергиясының 17%-ы осы кәсіпорынның үлесіне тиесілі. 2001 жылдан бастап «ЕЭК» АҚ Ақсу электр станциясының энергия блоктарын реконструкциялаудың ауқымды бағдарламасын іске асыруда. Қазіргі уақытта сегіз энергоблоктың бесеуін кешенді жаңғырту жұмыстары аяқталды. Бұл жұмыстар электр станциясының қуаттылық резервін, жабдықтың сенімділігі мен беріктігін арттыруға, өндірістік сипаттамалар мен экологиялық параметрлерді жақсартуға бағытталған. Жүргізілген жұмыстардың нәтижесінде станцияның белгіленген қуаты 2 450 МВт-ы құрайды.  

Ақсудағы ферроқорытпа зауыты - әлемдегі ең ірі металлургиялық кәсіпорындардың бірі. Өндірістік қуаты жылына бір миллион тоннадан астам хром, кремний және марганец қорытпалары бар кәсіпорында алты мыңнан астам жұмыс істейді.  

Бұдан кейін облыс әкімі қалалық ауруханаға барды. Денсаулық сақтау мекемесінің ғимараты күрделі жөндеуді қажет етеді. Негізгі ғимаратты, әкімшілік ғимаратты және қосалқы құрылыстарды жаңарту қажет. Қазір емдеу мекемесін ауданаралық аурухана мәртебесіне ауыстыру мәселесі қарастырылуда, онда тек Ақсу тұрғындары ғана емес,  облыстың жақын аудандары да медициналық қызметтерді ала алады. Бұл жағдайда аурухананы күрделі жөндеу мен жарақтандыруды қаржыландыру республикалық бюджеттен қаржыландырылатын болады. Өңір басшысы бұл ұсынысты қолдап, денсаулық сақтау басқармасына мәселені бейінді министрліктің қарауына беру үшін тиісті құжаттарды дайындауды тапсырды. 

Ақсу қаласын дамыту жөніндегі кеңесте облыс әкімі қалада тұрғын үй, әсіресе әлеуметтік тұрғын үй құрылысы белсенді жүргізіліп жатқанын атап өтті. Дегенмен, өткен жылдың қорытындысы бойынша бірқатар нысандар бойынша артта қалу деректері бар. 

Барлық нысандардың құрылысын жеке бақылауда ұстауды тапсырамын. Қажет болса, апта сайын мердігерлермен кездесіп, проблемалық мәселелерді жедел пысықтаңыздар, - деді Асайын Байханов.

Облыс әкімі жер қатынастары саласындағы актілер мен қаулыларды қабылдау мәселелерін ерекше бақылауда ұстауды тапсырды. Мұның себебін ол Ақсу тұрғындарынан жер комиссиясының жұмысы бойынша бірнеше рет шағымдар келіп түскенімен байланыстырды.  

Тұрғын үй-коммуналдық сала объектілерінің жұмысының мәселелері де назардан тыс қалған жоқ. Облыс әкімі қолданыстағы иесіз желілерге толық талдау жүргізуді тапсырды.  

Бірнеше жыл бойы қаланың ең өзекті мәселесі жаңа қазандықты іске қосу болып отыр. Облыс әкімі жауапты тұлғаларға жобаны түзету мүмкіндігін қарастыруды тапсырды. Сондай-ақ, қаланың магистральдық және жылу тарату желілерін қайта жаңартуды бастау қажет.  

Өзгерістер тек Ақсу қаласында ғана емес, оның ауылдық аймағында да орын алады. Қалқаман кентінде су құбырының сорғы станциясын, Айнакөл ауылында сумен жабдықтау желілері мен сорғы станциясын, Черемушки ауылында инженерлік желілерді салу жоспарланған.

Пограничник ауылында фельдшерлік пункт құрылысын бастау қажет. Сондай-ақ, «Ауыл – ел бесігі» жобаларын Пограничник, Достық және Жолқұдық ауылдарында сапалы іске асыруды, Ақсу қаласындағы № 7 ЖОББМ мен Қалқаман кентіндегі дене шынықтыру-сауықтыру кешеніне уақтылы күрделі жөндеу жүргізуді қамтамасыз ету керек, - деп тапсырды Асайын Байханов.

Қысқа да нұсқа. Жазылыңыз telegram - ға