Түркияның Хатай аймағында екі жыл бұрын орын алған жойқын зілзаладан кейін баспанасынан айырылған 55 жастағы Әли Бозоғлан үңгірде өмір сүріп жатыр. Үш баланың әкесі Бозоғланның өмірі Дефне ауданының Чекмече аймағындағы жер сілкінісінен кейін күрт өзгерді, деп хабарлайды El.kz ақпарат агенттігі.
Зілзала Әли Бозоғланға ауыр психологиялық соққы әкелген. Осыдан кейін ол Самандағ жеріндегі Яйлыжа ауданының маңында орналасқан үңгірді тауып, сол жерге қоныстануға шешім қабылдаған. Оның айтуынша, үңгір оған адамдардан алшақ, қауіпсіз әрі тыныш өмір сүруге мүмкіндік береді. Ол үңгірдегі үйіне бару үшін мотоциклді пайдаланады.
Дефне округінің әкімшілігі Әли Бозоғланға контейнер ұсынғанымен, ол өзін үңгірде жайлы сезінетінін айтып, бұл ұсыныстан бас тартқан.
Мен жер сілкінісінен кейін 2 жыл бойы осында өмір сүріп келемін және бұл үңгірде жанымның тыныштығын таптым. Мыңдаған жылдар бойы қирамаған бұл үңгір маған сенімділік береді. Күнім өте жақсы өтуде, – дейді ол.
Әли Бозоғлан үңгірдегі тұрмысы жақсы екенін айтады.
Мен үйленгенмін, үш балам бар. Дәретхана үшін септик қазайын дегенде, ауылдың құбырларын бүлдіріп алдым. Енді басқа шешім табуым керек. Сондай-ақ, электр қуаты мәселесі де өзекті болып тұр. Мүмкіндік болса, күн батареясын орнатып, кір жуғыш машина мен тоңазытқышты іске қосқым келеді, - дейді ол.
Әли Бозоғланның бұл ерекше өмір салты қоғам назарын аударып, оның табиғатпен үйлесім табуға деген ұмтылысын көрсетіп отыр.