Бишімбаевтың ісі бойынша сот отырысындағы жарыссөз кезінде адвокат Ерлан Ғазымжанов айыптау бойынша жылына үш рет ұрып-соғу болғанын атап өтті, деп хабарлайды El.kz ақпарат агенттігі.
Ол Нүкенованы «жүйелі азаптап өлтірді» деп санауға болмайтынын алға тартты.
Қылмыстық кодекстегі аталған бапты ашсаңыз, онда азаптау дегеніміз – жүйелі түрде ұрып-соғу деп жазылғанын көресіз, алайда некеде болған кезде осыған ұқсас үш жағдай ғана болған. Бұл жүйелі түрде ұрып-соғуға жата ма? Олар бірге серуендеп, бірге демалды, қымбат әшекейлер тағып, киім-кешек алды, бар болғаны үш рет қана жанжал шығарып, үш рет қақтығыс орын алды. Бұл жүйелі азаптау, жүйелі түрде ұрып-соғуға жата ма? Онда кез келген отбасыға барып, жылына шыққан үш жанжал үшін 4 жылдан 7 жылға дейін жаза тағайындайық, - деді Ғазымжанов.
Осы сөздерден соң судья Айжан Құлыбаева адвокатқа ескерту жасады. Судья оған қылмыстық іс жүргізу заңнамасын бұзатын мысалдар айтқанын түсіндірді.
Құрметті сот, сіз маған үнемі қоқан-лоқы көрсетесіз, бірақ басқаларға бұлай жасамайсыз, - деді адвокат.