Соңғы 10 жылда Қазақстан мен Франция арасындағы жыл сайынғы сауда көлемі 2,5-6,5 млрд долларды құрады, оның 80-90%-і қазақстандық тауарлардың экспорты болды, деп хабарлайды El.kz ақпарат агенттігі.
Франция еліміздің негізгі сауда серіктестерінің бірі болып табылады. Мысалы, 2022 жылы біздің тауар айналымымызда ол 8-орынды иеленді.
ҚР ҰЭМ мәліметінше, 2023 жылғы қаңтар-тамызда Қазақстан мен Франция арасындағы тауар айналымы 2,7 млрд долларды құрады, бұл 2022 жылдың сәйкес кезеңімен салыстырғанда (2,2 млрд доллар) 21,1%-ке жоғары.
Осылайша, 2023 жылы Франция ҚР сауда бойынша 7 негізгі серіктестерінің қатарына енді.
Қазақстаннан Францияға экспорт 2023 жылғы қаңтар-тамызда 2,9%-ке өсіп, 1,8 млрд. долларды құрады. Францияға экспорттың өсуі келесі тауарларды жеткізудің ұлғаюымен негізделеді:шикі мұнай – 6,2%-ке 1,7 млрд долларға дейін және титан мен одан жасалған бұйымдар – 98,4%-ке 46,8 млн долларға дейін, - делінген мәліметте.
Бұл ретте келесі тауарлардың экспорттық жеткізілімдерінің төмендеуі байқалады: уран – 45,8%-ке 79,4 млн долларға дейін, күкірт – 100%-ке.
Ал Франциядан Қазақстанға импорт көлемі 2023 жылғы қаңтар-тамызда 881,8 млн долларды құрады.