"Қазақстан Парамаунт Инжиниринг" ЖШС Қазақстандық қорғаныс кәсіпорны ТЖМ техникалық тапсырмасы бойынша әзірлеген "Алан-2" радиациялық, химиялық, биологиялық барлау арнайы машиналары Қарағанды және Алматы облыстарында орналасқан ТЖМ әскери бөлімдеріне берілді, деп хабарлайды EL.kz ақпарат агенттігі.
Міндеттердің ерекшелігіне байланысты арнайы машиналарды елдің басқа күштік құрылымдары да қолдана алады.
Арнайы машина радиациялық, химиялық және биологиялық барлауды, мониторингті, аумақтар мен объектілерді РХБ бақылауды жүргізуге арналған.
Машинаның корпусы толығымен брондалған, герметикалық, бұл жеке құрам мен жабдықты соққы толқыны, құлаған қоқыстар, аймақтың РХБ ластануы сияқты басқа да техногендік апаттардың әсер ету факторларынан қорғауға мүмкіндік береді.
Алан - 2 навигация, түнгі көру, бейнебақылау, жарықтандыру, өрт сөндіру, жылыту, желдету жүйелерімен және сүзгі желдеткіш қондырғысымен жабдықталған.
Кешеннің арнайы жабдықтарының басты артықшылығы барлық аспаптарды бірыңғай автоматтандырылған жүйеге біріктірілуі болып табылады, бұл радиациялық, химиялық және биологиялық қауіптер туралы анықталған ақпараттың жеделдігін, дұрыстығын және толықтығын қамтамасыз етуге мүмкіндік береді.
Арнайы жабдыққа кіретін негізгі құралдар:
- биологиялық барлау құралы - ауадағы ықтимал зиянды биологиялық бөлшектерді үздіксіз бақылауға, биологиялық қауіптердің, оның ішінде бактериялардың, вирустардың, риккетсия қоздырғыштарының және токсиндердің анықталуы туралы ескертуге арналған;
- химиялық барлау детекторы - жауынгерлік улы заттар мен токсинді өнеркәсіптік химиялық заттарды анықтауға, классификациялауға арналған;
- радиация детекторы - арнайы машинаның ішіндегі гамма және радиациялық фонды анықтау және бақылау үшін;
- автоматты борттық метеокешен - метеодеректерді жинауға арналған;
- мастер модуль - барлау деректерін жинауға, өңдеуге және талдауға, дыбыстық және жарық сигналын беруге арналған;
- бағдарламалық жасақтамасы бар дербес қорғалған компьютер;
- қоршау белгілерін орнатудың автоматты жүйесі - инфекция аймақтарының шекараларын белгілеу.
Орнатылған жабдық заманауи талаптарға сай келеді.
Бүгінгі таңда арнайы машина зауыттық сынақтардан өтті, енді ТЖМ әскери бөлімдерінің базаларында тәжірибелік әскери пайдалану жоспарлануда.
Келесі жылы тағы екі арнайы машина елдің батысы мен шығысындағы ТЖМ әскери бөлімдерінің техника паркін толықтырады.