Қызылорда облыстық Қазақстан халқы ассамблеясының ұйымдастыруымен Достық үйінде Қоғамдық келісім кеңесінің кезекті отырысы өтті.
«Қоғамдық келісім» КММ директорының орынбасары, облыстық Қоғамдық келісім кеңесінің төрағасы Асылбек Жұмабаев «Дипломмен ауылға» бағдарламасын және жастар практикасын жетілдіру мәселелерін ортаға салды.
«Дипломмен ауылға» бағдарламасы бойынша облыстық ауылшаруашылық басқармасының басшысы Қамбарбек Мүбараков баяндама жасап, Елбасы Н.Назарбаевтың тапсырмасымен 2009 жылдан бері іске асырылып келе жатқан «Дипломмен – ауылға!» әлеуметтік бағдарламасы ел болашағы – жастардың өз мамандықтарына сай жұмысқа орналасып, баспана алып, өмірден орындарын табуларына, сондай-ақ ауылдық елді мекендерді денсаулық сақтау, білім беру, әлеуметтік қамсыздандыру, мәдениет, спорт және ауыл шаруашылығы салаларының жас мамандарымен қамтамасыз етуге қолайлы мүмкіндік бергендігін тілге тиек етті.
«2019 жылға 323 маманға бір жолғы көтерме жәрдемақы төлеуге 61,6 млн. теңге, тұрғын үй несиесіне 503 маманға 1,9 млрд. теңге бөлінді.
Бүгінгі күні 323 маманға 61,6 млн. теңге көлемінде көтерме жәрдемақы берілсе, 521 маманға 1,9 млрд. теңге сомасында тұрғын үй несиесі берілді.
Жалпы, аталған жобаға қатысушылар саны жылдан жылға артуда. Жобаны жүзеге асыру аясында берілетін бюджеттік несие көлемі бойынша биылғы жылы біздің облыс республикада алдыңғы қатарда.
Елбасы биыл «Жастар жылы» аясында аталған жобаға енгізілетін мамандықтардың тізімін кеңейту және мамандарға төленетін көтерме жәрдемақы мөлшерін 70-тен 100 айлық есептік көрсеткішке дейін арттыруды тапсырған болатын.
Осыған байланысты, Ұлттық экономика министрлігіне 2020-2022 жылдарға 2 971 маманға көтерме жәрдемақы беру жөнінде енгізілген ұсынысқа сәйкес 2020-2022 жылдары мамандарға 100 айлық есептік көрсеткіш көлемінде көтерме жәрдемақы төлеуге қосымша 249,9 млн. теңге бөлінді.
Сонымен қатар, 2020 жылы 566 маманды тұрғын үй несиесімен қамтамасыз ету үшін республикалық бюджеттен 2,250 млрд. теңге қаржы бөлінді»,-деді.
Өз кезегінде облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Гаухар Қалмақова жастар тәжірибесін жетілдіру бойынша атқарылған шараларға тоқталып өтті.
«Еңбек» мемлекеттік бағдарламасы аясында жыл басынан 29649 адам қатыстырылды. Оның ішінде, ауыл тұрғындары – 57 пайыз, қала тұрғындары - 43 пайыз құрады. Кәсіпкерлік бастамаларды дамытуға 10,5 млрд. теңге қаржы бөлінген. Нәтижесінде 948 адам шағын несие алып, қосымша 843 жаңа жұмыс орындарды ашты. Жаңа бизнес – идеяларды іске асыруға мемлекеттік грант 2662 адамға грант беріліп өз кәсіптерін ашты. Бұл бастаманың да мөлшері 2020 жылдан бастап барлық бағдарлама қатысушыларына 200 айлық есептік көрсеткіш көлемінде берілетін болады. Осылайша кепілі жоқ азаматтарға кәсіпкерлікпен айналысуға мүмкіндік береді.
Жұмыспен қамтудың белсенді шараларымен 25405 адам қамтылды, соның ішінде бос жұмыс орындарына орналасқаны – 14353 адам, әлеуметтік жұмыс орындарына – 1254 адам, жастар тәжірибесіне – 3114 адам. Тұрақты жұмысқа орналасқаны – 499 адам»,-деді.
Айта кететіні ендігі кезекте жастар тәжірибесінен өткен жас мамандардың тұрақты жұмыспен қамтылу деңгейін көтеруге «Еңбек» бағдарламасына жаңадан енгізілетін 2 жоба мүмкіндік береді. «Алғашқы жұмыс орны» жобасы - жастардың жұмыспен қамту мүмкіндіктері кеңейтіп, 2 жылға дейін жұмыспен қамтылып, алғашқы жылдың еңбек ақысы бюджеттен субсидияланады. Ал, «Ұрпақтар байланысы» жобасы - зейнеткерлік жасқа жеткен қызметкер-тәлімгердің қасына бағдарламаға қатысушы 18 айға тұрақты жұмысқа орналасады. Әрі қарай тәлімгердің орнын жас маман басады.
Отырыс аясында кеңес мүшелері жастар тәжірибесі аясында еңбек лагерьлерін ұйымдастыру арқылы жастарды ауылшаруашылық саласына тартуға ұсыныс білдірді. Сонымен бірге тәжірибе алуға келген әрбір жас маманға өз саласы бойынша білікті тәлімгерді бекіту маңызды екендігін ортаға салды.