Парламент палаталарының бірлескен отырысында Конституциялық Сот төрағасы Эльвира Әзімова «Қазақстан Республикасындағы конституциялық заңдылықтың жай-күйі туралы» мәселелері жөнінде айтты, деп хабарлайды El.kz ақпараттық агенттігі.
Бес ай ішінде үш мыңнан астам азамат өз құқықтарын конституциялық қорғауға жүгінген.
Конституциялық Соттың бес айдағы жұмысы азаматтардың өз өтініштерінде заңдардың жекелеген ережелерінің конституциялылығы проблемаларын әділ көтеретінін көрсетті. Бұл цифрлар азаматтардың жаңа органға деген жай ғана қызығушылығының дәлелі болып табылмайды, өтініш берушілердің әрқайсысының өз құқықтарын қорғау ниетін растайды. Бұл ретте Қазақстан заңнамасында Конституциялық сотқа жүгінгенге дейін құқықтық қорғаудың барлық басқа құралдарын қолдану туралы талап жоқ, - дейді төраға.
Эльвира Әзімова азаматтар Конституциялық Сотқа жүгіне отырып, әділдік пен заңдылықты орнатуға жәрдемдесетінін айтты.
Келіп түскен өтініштердің жартысына жуығы (шамамен 41%) сот шешімдерімен келіспеуге қатысты. Бұл ретте Конституциялық Сот сот шешімдеріне баға беруге құқылы емес екеніне назар аудару керек, - дейді ол.
Атап айтсақ, азаматтардан келіп түскен өтініштердің бір бөлігі сот актілерінің орындалмауына, тұрғын үй және еңбек қатынастарына, әлеуметтік қорғауға, жазалардың орындалуына, ақпаратқа қол жеткізуге, жеке тұлғалардың банкроттығына және тағы басқаларға қатысты.
Өтініштердің төрттен бірінде ғана (26%) азаматтар заңдар мен басқа да нормативтік құқықтық актілердің конституциялылығын тексеруді сұрайды.
20 өңір бөлінісінде ең көп өтініштер Астана, Алматы қалалары мен Қостанай облысының тұрғындарынан келіп түсті.
Өтініштерді қарау қорытындысы бойынша Конституциялық сот Республикадағы конституциялық заңдылықтың жай-күйі туралы жыл сайынғы жолдауын ұсынуға міндетті.
Сонымен қатар, қоғамның жаңадан құрылған конституциялық бақылау органының жұмысына қызығушылығын ескере отырып, ағымдағы жылды ескерусіз қалдырмай, сіздердің назарларыңызға қызмет басталғаннан бергі алғашқы бес айға жолдауды ұсыну туралы шешім қабылданды.
Осы кезеңдегі конституциялық іс жүргізу қорытындысы бойынша, өкінішке қарай, жекелеген нормативтік құқықтық актілерде елеулі олқылықтардың бар екені анықталды. Қабылданған он сегіз нормативтік қаулының бесеуінде нормалар конституциялық емес деп танылды, тағы бесеуі бойынша Конституциялық Сот біркелкі құқық қолдану мақсатында тиісті нормаларға түсіндірме берді, - деп түсіндірді Эльвира Әзімова.